Քանի որ Հայաստանի Հանրապետությունում միջին խավ չկա, խիստ դժվար է նշել, թե մոտավորապես որքան գումար է անհրաժեշտ միջին վիճակագրական հայ ընտանիքին Նոր տարվա պատրաստություն տեսնելու համար, Azg.am-ի թղթակցի հետ զրույցում ասաց «Սպառողների խորհրդատվության կենտրոն» ՀԿ-ի նախագահ Կարեն Չիլինգարյանը՝ հավելելով, որ ըստ հարցումների՝ աղքատ ընտանիքներն Ամանորը նշելու համար կարողանում են հատկացնել առավելագույնը 70-80 հազար դրամ, մինչդեռ հարուստ խավի ներկայացուցիչների ճոխ սեղանների ընդամենը մեկ դելիկատեսը կարող է 400-500 հազար դրամ արժենալ։
«Այս պահին ամենապահանջված ամանորյա ուտեստը՝ խոզի ազդրամիսը, համեմատաբար հասանելի է դարձել, և շատերը կարողանում են Նոր տարվա սեղաններին այն ունենալ։ Քիչ չեն ընտանիքները, որոնք անցել են հնդկահավին։ Ընդհանուր առմամբ, 50-60 հազարից սկսած՝ կարելի է տոնական սեղան պատրաստել։ Սա մինիմալ սահմանն է՝ առանց խոզի ազդրամիս գնելու, որը կարող են իրենց թույլ տալ աղքատ խավի ներկայացուցիչները, այն մարդիկ, որոնք նվազագույն աշխատավարձ են ստանում կամ ապրում են նպաստով»,- ասաց մեր զրուցակիցը։
Կարեն Չիլինգարյանն ուշադրություն հրավիրեց այն հանգամանքի վրա, որ տարեցտարի ավելի ու ավելի փոքր թվով հայ ընտանիքներ են բանկերից վերցրած վարկերով Նոր տարի նշում։ Դա, ըստ «Սպառողների խորհրդատվության կենտրոն» ՀԿ-ի նախագահի, հետևանք է քաղաքացիների որոշ շրջանակների եկամուտների ավելացման։
«Ինչքան էլ մարդիկ բողոքեն, վիճակը չես համեմատի 5-10 տարի առաջվա հետ։ Միաժամանակ, ինչպես ասացի՝ մեր երկրում միջին խավ այդպես էլ չձևավորվեց, մինչդեռ քաղաքակիրթ աշխարհում հենց այդ խավն է պահում, զարգացնում երկիրը։ Ներկա պայմաններում Հայաստանում միջին խավի ներկայացուցիչ կարող է համարվել այն մարդը, ով գոնե 300-400 հազար դրամ աշխատավարձ է ստանում, վճարում կոմունալ և ընթացիկ մյուս ծախսերը և այդքանից հետո շարունակում է իրեն բավարարված զգալ»,- ասաց նա։
Դիտարկմանը, որ հասարակության մի ստվար զանգվածի եկամուտներն ամենևին էլ չեն ավելացել, հակառակը՝ գնաճի պայմաններում զգալի նվազել են, Կարեն Չիլինգարյանն արձագանքեց՝ բնականաբար, դա էլ կա։
Իսկ հնարավոր համարո՞ւմ է, որ մարդկանց գիտակցության մակարդակն է բարձրացել, և շատերը պարզապես չեն ցանկանում թանկացումների ֆոնին Ամանորի սեղանների պատճառով նոր վարկի բեռի տակ ընկնել, հետաքրքրվեցինք Չիլինգարյանից։
«Այդ տարբերակն էլ, անխոս, կա։ Շատերը չեն ցանկանում վերջին կոպեկը ծախսել, ճոխ սեղան դնել, հետո վարկ մարել։ Գումարծ դրան՝ շատերը նույնիսկ գերադասում են բարեկամների հետ, շրջաններում քիչ ծախսելով՝ նշել Նոր տարին»,- ասաց նա։
