Գյումրիում անցկացված, Հայաստանում նորահնար «փրայմերիզի» կամ «նախնական քվեարկության» արդյունքների հիման վրա վարչապետ Փաշինյանն այստեղ համայնքի ղեկավարի ժամանակավոր պաշտոնակատար նշանակեց միասնական սոցիալական ծառայության տեղի ստորաբաժանման պետ Սարիկ Մինասյանին: Վերջինս Գյումրին կղեկավարի առնվազն մինչեւ համայնքային ավագանու եւ համայնքի ղեկավարի արտահերթ ընտրությունները:
Հանրապետության երկրորդ քաղաքում կառավարման ճգնաժամ էր առաջացել մեկուկես ամիս առաջ, երբ համայնքային ավագանու ամենամեծ խմբակցությունը՝ «Բալասանյան դաշինքը» ներկայացնող 14 անդամները Բալասանյան ընտանիքի անդամների դեմ նախաձեռնված քրեական վարույթից հետո վայր դրեցին իրենց մանդատները, տեղական ինքնակառավարման մարմինը նաեւ մնաց առանց քաղաքապետի, նրա տեղակալների ու որոշ բաժինների վարիչների: Գյումրու քաղաքապետարանի աշխատակազմին ներկայացնելով համայնքի ղեկավարի ժամանակավոր պաշտոնակատարին՝ ՀՀ տարածքային կառավարման եւ ենթակառուցվածքների նախարար Դավիթ Խուդաթյանը հույս է հայտնել, որ նա կարճ ժամկետում կկարողանա իրավիճակի հետեւանքով առաջացած խնդիրներին լուծումներ գտնել:
Սարիկ Մինասյանը համայնքապետարանում աշխատել է որպես բաժնի պետ: Նա անկուսակցական է, բայց վայելում է իշխող «Քաղաքացիական պայմանագիր» կուսակցության աջակցությունը եւ տեղական արտահերթ ընտրություններում լինելու է ՔՊ-ի նախընտրական ցուցակի առաջին համարը: Միայն թե այնտեղ օրինաչափ են համարում, որ առաջիկայում կանդամակցի տվյալ կուսակցությանը:
Բոլոր դեպքերում այս ինքնիրեն, թե հատուկ ստեղծված իրավիճակի շահառուն, թվում է, իշխող կուսակցությունն է, որի համար սա Գյումրու նման քաղաքում վերջապես իշխանությունը վերցնելու շանս է ստեղծում: Իսկ հեռու չեն նաեւ գալիք խորհրդարանական ընտրությունները, որի համար էլ երեւի կարող են ձեռք-ձեռքի աշխատել տեղում ընտրվելու դեպքում իշխանության աջակցությունը վայելող քաղաքապետն ու այժմ նշանակվող ՔՊ-ական նոր մարզպետը:
Բայց երկու դեպքում էլ վերջին խոսքն ասողը, հուսանք, բազմախնդիր եւ կուսակցական շահախնդրություններին շատ չտրվող Գյումրին ինքը կլինի:
Ավագանու արտահերթ ընտրություններն ըստ ամենայնի տեղի կունենան 2025 թ. մարտի 30-ին:
ԳԵՂԱՄ ՄԿՐՏՉՅԱՆ
