Մենք կարծում ենք, որ մինչև իրավական գործընթաց չլինի, լրատվամիջոցներում հեղինակային իրավունքի հետ կապված խախտումները չեն վերանալու, «Հեղինակային իրավունքի խախտումները ԶԼՄ-ներում. «Ֆոտոլուրի» վեճերը» թեմայով քննարկման ժամանակ ասաց փաստաբան, ԶԼՄ-ների էթիկայի «Դիտորդ» մարմնի անդամ Արա Ղազարյանը։
«ԶԼՄ-ներին «Ֆոտոլուր»-ի լուսանկարներն անօրինական կերպով օգտագործելու մասին ծանուցել ենք 3-4 անգամ. արձագանքները տարբեր են եղել։ Մոտավորապես 20 տոկոսն է ընդունել, որ խախտում է թույլ տվել, ներողություն խնդրել և այլևս նույն պրակտիկան չի կրկնել։ Մեծամասամբ կա՛մ չեն արձագանքել, կա՛մ էլ արձագանքել են, ընդունել են իրենց սխալը, բայց նորից կրկնել են։ Եվ եղել են նաև արտառոց պատասխաններ, որ ոչինչ էլ չեն խախտել։ Եղել է, որ մեզ ասել են՝ ինչպե՞ս եք համարձակվում մեղադրել գողության մեջ, մենք էլ ասել ենք, որ չենք մեղադրում, ուղղակի ծանուցում ենք»,- ասաց Արա Ղազարյանը։
Ըստ փաստաբանի՝ իրենց առաջնային նպատակն այն է, որ նշված մթնոլորտը, արժեհամակարգը փոխվի, մարդիկ հասկանան, որ գույքային իրավունքները պետք է հարգվեն, այնուհետ՝ պաշտպանվեն «Ֆոտոլուր»-ի իրավունքները։
«Ֆոտոլուր» գործակալության տնօրեն Մելիք Բաղդասարյանն էլ իր հերթին նկատեց, որ գործակալության լուսանկարների ապօրինի օգտագործումը նախ իր տրամադրությունն է գցում։
«Դուրս է գալիս՝ իզուր ես աշխատում, երկրորդ՝ այսօր «Ֆոտոլուր»-ի ֆինանսական վիճակը բավականին դժվարացել է։ Եթե մեր թողարկած լուսանկարների 80 տոկոսը գողանան, մնացած 20 տոկոսը չնչին գումար է կազմում, իսկ լուսանկարչությունը պետք է ունենա վճարվող աշխատողներ, լավ սարքավորումներ։ Այդ ամենը գումար է պահանջում»,- ասաց բանախոսը։
Ամփոփելով՝ Արա Ղազարյանը շեշտեց, որ Դատավարական օրենսգիրքն իրենց հնարավորություն է տալիս շատ մեծ ամպլիտուդով վնասի փոխհատուցում հայցել։
«Այնպես որ, եթե մտածում են, որ 3 հազար դրամի համար պետք է գնանք դատարան, բնականաբար՝ ոչ։ Երևի առաջիկա մեկ ամսում արդեն դատարան կդիմենք»,-ասաց փաստաբանը։
