Ուկրաինայի համար անվտանգության լավագույն երաշխիքները մնում են անդամակցությունը Եվրամիությանը և ՆԱՏՕ-ին, սակայն անհնար է երկիրը ռազմական դաշինք հրավիրել մասամբ՝ առանց օկուպացված տարածքների։ Այս մասին Ուկրաինայի նախագահ Վլադիմիր Զելենսկին հայտարարել է Եվրոպական խորհրդի նոր ղեկավար Անտոնիու Կոշտայի հետ Կիևում կայացած համատեղ մամուլի ասուլիսում։
Ուկրաինայի նախագահն ընդգծել է, որ Կիևը երբեք իրավաբանորեն չի ճանաչի Ռուսաստանի կողմից իր տարածքների օկուպացիան։
«Մենք չենք ճանաչում այդ հողերը որպես ռուսական։ Դրանք մեր հողերն են, նրանք մեր ժողովուրդն են։ Ուկրաինայի ժամանակավոր օկուպացված հատվածներ: Իհարկե, այդ ամենը կվերադառնա։ Իհարկե, շատ կուզենայի, որ մեծամասնությունը վերադառնար դիվանագիտական ճանապարհով։ Ես վստահ չեմ, որ Պուտինը դա հասկանում է, բայց ես ուզում եմ, որ քաղաքակիրթ աշխարհը մեծ մասամբ դա հասկանա»,- Զելենսկու խոսքերն է մեջբերում meduza.io-ն։
ՆԱՏՕ-ին անդամակցելու հրավերը պետք է լինի ամբողջ Ուկրաինայի համար, այլ ոչ թե դրա մի մասի։
«Ուկրաինայի տարածքի մի մասի համար ՆԱՏՕ-ի հրավեր լինել չի կարող։ Սա ավտոմատ ճանաչում է, որ մնացած բոլոր տարածքները ոչ միայն վտանգի տակ են, այլ բոլոր մյուս տարածքները ուկրաինական չեն, ուստի Ուկրաինան երբեք չի համաձայնի դրան։ Եթե լինի հրավեր, ապա միայն բոլոր տարածքների համար»,- ասել է Զելենսկին։
