Բնական է, որ եթե սահմանը սահմանազատված չի, ապա ակնհայտ է, որ մի տեղ դուք կարող եք մի քիչ առաջ լինել, մի տեղ կարող է ես առաջ լինեմ: ԱԺ-ում լրագրողների հետ զրույցում այսօր այս մասին ասաց ԱԺ նախագահ Ալեն Սիմոնյանը՝ պատասխանելով այն հարցին՝ արդյոք վտանգավոր չէ իր կողմից երեկ հնչեցված հայտարարությունը, որ տեղեր կան՝ հայկական կողմն է առաջ գնացել. մասնավորապես սա կարող է ադրբեջանցիներին հիմքեր տալ պնդելու, որ հայերն իրենք են ընդունում՝ որոշ հատվածներում մխրճվել են Ադրբեջանի տարածք:
«Առնվազն Տավուշում 2 եռանկյունի կա, որտեղ իրենց մասի եռանկյունին գտնվում է մեր տիրապետության տակ, իսկ մերը՝ իրենց մասում է գտնվում: Դա որևիցե մեկի համար գաղտնիք չէ: Իմ ասածը հետևյալն է. բոլոր այն տեղերում, որտեղ իրենք են առաջ, իրենք պետք է հետ գնան, բոլոր այն տեղերում մենք ենք առաջ, մենք պետք է հետ գնանք: Մերը մերն է, իրենցը՝ իրենցն է»,-ասաց ԱԺ նախանշեց Սիմոնյանը՝ միաժամանակ շեշտելով, որ ինքը մանրամասն տեղեկություններ չունի, թե որ հատվածում ինչպիսին է իրավիճակը:
Ինչ վերաբերում է նախօրեին հայտնած իր այն մտքին, որ Ադրբեջանի հետ չեն քննարկել ադրբեջանական զորքերի՝ ՀՀ տարածքից դուրս գալու «մանրուքը», ԱԺ նախագահն ասաց. «Ես համարում եմ, որ հիմնական նպատակը խաղաղություն հաստատելն է, մեր 29 743 քկմ-ն արձանագրելը և սահմանը վեր հանելը:
Ես դա մանուրք չեմ համարում, ես ասում եմ, որ գլոբալ պատկերի մեջ մենք պետք է գլոբալ հարցերին անդրադառնանք: Շատ կարևոր հարցեր կան, որ ներառված չեն խաղաղության պայմանագրում: Դու երբևիցե չես կարող բոլոր հարցերը ներառել: Դրանցից ոչ մեկը չի կարելի մանրուք համարել, բայց այսօր գլխավոր նպատակը սահմանը վերարտադրելն է և խաղաղության պայմանագիր կնքելը: Դրանից հետո մեր քաղաքացիները մեր հարևանների հետ առևտուր են անելու, փոխայցեր են անելու, բոլոր հարցերը լուծվելու են»:
