2013-ի հունիսին 2012-ի հունիսի նկատմամբ գնաճը կազմել է 6,5 տոկոս: Այս ցուցանիշն է հրապարակել ազգային վիճակագրական ծառայությունը, ներկայացնելով սպառողական գների ինդեքսը Հայաստանի Հանրապետությունում 2012-ի հունիսին: Այսինքն, ինչպես եւ կանխատեսվում էր, գնաճը Հայաստանում դուրս է եկել ԿԲ մատնանշած 4 տոկոս գումարած-հանած 1,5 տոկոս նպատակային միջակայքից: Միաժամանակ, 2013-ի հունիսին մայիսի համեմատ գները մնացել են անփոփոխ, 2012-ի դեկտեմբերի համեմատ գնաճը կազմել է 2,7 տոկոս, իսկ 2013-ի հունվար-հունիսին 2012-ի հունվար-հունիսի համեմատ գնաճը կազմել է 4,1 տոկոս:
Պարենային ապրանքների գները 2013-ի հունիսին նախորդ տարվա հունիսի համեմար աճել են 9 տոկոսով, իսկ այս տարվա մայիսի համեմատ` նվազել 0,6 տոկսով, ոչ պարենային ապրանքներինը` 2012-ի հունիսի նկատմամբ աճել են 4,8 տոկոսով, իսկ մայիսի նկատմամբ` 0,1 տոկոսով, ծառայությունների գները նախորդ տարվա հունիսի համեմատ աճել են 3,4 տոկոսով, այս տարվա մայիսի համեմատ` 0,9 տոկոսով:
Պարենային ապրանքներից հունիսին մայիսի նկատմամբ արձանագրված 0,6 տոկոս գնանկման վրա անմիջական ազդեցություն է թողել բանջարեղենի եւ կարտոֆիլի 8,1 տոկոս եւ շաքարավազի 1 տոկոս գնանկումը:
Կաթնամթերքի դեպքում հունիսին մայիսի նկատմամբ արձանագրվել է 2 տոկոս գնաճ, իսկ անցյալ տարվա հունիսի նկատմամբ` 10,1 տոկոս գնաճ: «Լոռի» պանրի գինը մայիսի համեմատ նվազել է 0,7 տոկոսով, «Չանախինը»` 0,2 տոկոսով: Յոգուրտի գինը աճել է 13,4 տոկոսով, թթվասերինը` 11,3 տոկոսով, թարմ կաթինը` 16,7 տոկոսով, մածունինը` 17,7 տոկոսով, կաթնաշոռինը` 18,3 տոկոսով: Ձվի գները մայիսի համեմատ նվազել են 0,3 տոկոսով: Մսամթերք ապրանքախմբում մայիսի նկատմամբ արձանագրվել է 0,6 տոկոս գնաճ: Մրգի ապրանքախմբում հունիսին մայիսի համեմատ արձանագրվել է 0,4 տոկոս գնաճ, իսկ անցյալ տարվա հունիսի նկատմամբ` 18,4 տոկոս գնաճ:
Հիշեցնենք, որ սպառողական գների ինդեքսը ազգային վիճակագրական ծառայությունը որոշում է հիմք ընդունելով շուրջ 500 ապրանքների եւ ծառայությունների գների դինամիկան:
