Եթե այս հակամարտության Արցախյան մասը չկարգավորվեց, ես վստահ եմ, որ երբեւէ կայուն խաղաղություն չի լինելու, որովհետեւ Ադրբեջանի իշխանությունները իրենց զգում են խրախուսված եւ անպատիժ։ Այս մասին այսօր՝ սեպտեմբերի 22-ին, լրագրողների հետ զրույցի ժամանակ ասաց Արցախի Հանրապետության նախկին պետնախարար Արտակ Բեգլարյանը։
«Եւ դրանից ելնելով՝ իրենք շարունակելու են նույն հանցագործությունները արդեն Հայաստանի Հանրապետության տարածքում», – նշեց Բեգլարյանը։
Նրա խոսքով՝ արցախցիների վերադարձը հայրենիք իրատեսական է երկարաժամկետ կտրվածքով։
«Եթե մենք պայքարենք եւ Հայաստանի Հանրապետության իշխանությունները իրենց դիրքորոշումը կտրուկ փոխեն ու տեր կանգնեն Արցախի ժողովրդի իրավունքներին, որոնք ամրագրվել են նաեւ հենց Հայաստանի Հանրապետության հայցերի հիման վրա ՄԱԿ-ի Արդարադատության միջազգային դատարանի կողմից, մենք ժամանակի ընթացքում կարող ենք ունենալ թե՜ Արցախի ժողովրդի վերադարձ, թե՜ արժանապատիվ, անվտանգ կյանք մեր հայրենիքում, թե՜ նաեւ կայուն, երկարաժամկետ ու արժանապատիվ խաղաղություն ամբողջ Հարավային Կովկասում», – ասաց Արտակ Բեգլարյանը։
