Պարզվում է՝ civic.am-ի լրագրող Դավիթ Լևոնյանը ծանոթ չէ Բագրատ Սրբազանի՝ իր դեմ ներկայացրած դատական հայցի բովանդակությանը։ Այդ բովանդակությանն անգամ ԱԱԾն- ու Գլխավոր դատախազությունն են անդրադսարձել՝ հրապարակելով հայտարարություն, որ Տավուշի թեմի առաջնորդ Բագրատ արքեպիսկոպոս Գալստանյանը ԿԳԲ-ի գործակալ չէ և Կրեմլից միլիոնավոր դոլարներ չի ստանում։
Ընդհանուր իրավասության դատարանի Արաբկիրի նստավայրում այսօր դատական առաջին նիստն էր, որը տեսանկարահանել civic.am-ի լրագրող Դավիթ Լևոնյանը չցանկացավ։ Դատարանն էլ բավարարեց նրա ցանկությունն, ու լրատվամիջոցները դատարանի դահլիճից դուրս եկան։
Սակայն դատական նիստը տեղի չունեցավ, որովհետև Դավիթ Լևոնյանը հայտարարել է, թե չի հասցրել Բագրատ Սրբազանի՝ իր դեմ ներկայացրած հայցին ծանոթանալ։
Հիշեցնենք, որ civic.am-ի լրագրող Դավիթ Լևոնյանը ապրիլին հրապարակում էր արել, թե իբր Բագրատ Սրբազանը ԿԳԲ-ի գործակալ է, Կրեմլից միլիոնավոր դոլարներ է ստանում և պատերազմ է հրահրում։
Բագրատ Սրբազանը նրա դեմ հայց է ներկայացրել։
Հունիսի 3-ին ԱԱԾ-ն հայտարությամբ է հանդես եկել, որ «Սիվիկ» լրատվականի լրագրող Դավիթ Լևոնյանի հայտարարությունները, թե Սրբազանը «ԿԳԲ» գործակալ է, միլիոնավոր դոլարներ է ստացել Կրեմլից և այդ հայտարարությունների առնչությամբ՝ Լևոնյանի նկատմամբ սուտ մատնության համար վարույթ նախաձեռնելու հաղորդումը շուրջ մեկ ամիս ստուգման առարկա է դարձվել ԱԱԾ-ում, սակայն Բագրատ Սրբազանի դեմ ոչինչ չեն հայտնաբերել։
Դատական հետաձգված ու չկայացած նիստից հետո փաստաբան Աննա Փիլոսյանը լրագրողներին հայտնեց. «Առաջին դատական նիստը հետաձգվեց՝ պատճառաբանությամբ, որ գործի նյութերին ծանոթ չեն, նոր է ներգրավել Քաղաքացիական պայմանագիր կուսակցության ներկայացուցիչը, եւ անհրաժեշտություն ունի գործի նյութերին ծանոթանալու։
Կանխատեսելի վարքագիծ էր, որովհետեւ կարծում ենք, որ պատասխանող կողմը ամեն կերպ ձգձգելու է գործի քննությունը՝ հաշվի առնելով հայցի առարկան՝ պատվի, արժանապատվությանը վերաբերվող հայց է ներկայացվել, որպեսզի ժամանակի ընթացքում հարցի հետաքրքրությունը նվազի, եւ բարենպաստ դատական ակտի պարագայում անգամ այլեւս համաչափ արձագանք չլինի տարածված արատավորող տեղեկատվությանը։ Քանի որ Civic.am կայքի դոմենը գրանցված է Քաղաքացիական պայմանագիր կուսակցության անվամբ, հայցը հարուցվել է Քաղաքացիական պայմանագիր կուսակցության նկատմամբ, հաշվի առնելով այն, որ իրավական տեսանկյունից՝ կայքը իրավունքի սուբյեկտ չէ:
Դատական նիստը հետաձգվել է մինչև նոյեմբերի 11-ը։
Ինչպես հայտնի է, Բագրատ արքեպիսկոպոս Գալստանյանը հայցադիմում էր ներկայացրել դատարան՝ ընդդեմ Civic.am-ի լրագրող Դավիթ Լեւոնյանի եւ ՔՊ կուսակցության՝ պահանջելով հերքել իր մասին զրպարտությունը։
Սրբազանը նաեւ պահանջում է դատարանից՝ պարտավորեցնել Դավիթ Լեւոնյանին և ՔՊ-ի անունով գրանցված Civic.am-ին հրապարակայնորեն՝ նույն եղանակով, ինչ տարածվել է զրպարտությունը, հերքել իր վերաբերյալ զրպարտությունը, որտեղ մասնավորապես ասվում է. «Զբաղվում է հայրենավաճառությամբ, փորձում է Հայաստանը ներքաշել պատերազմի մեջ, դրա փոխարեն Կրեմլից ստանում է միլիոնավոր դոլարներ, սնանկացման է հասցրել, գումարներ է վատնել, միգուցե եւ անձնական հաճույքների համար օգտագործել, փորձել է գահընկեց անել Գարեգին Բ-ին, ԿԳԲ-ի գործակալ է, պատերազմ է հրահրում հայ-ադրբեջանական սահմանին, փորձում է իրականացնել հեղաշրջում, հրաման է ստացել ԿԳԲ-ից, առաջ է շարժում ռուս-ադրբեջանական շահերը, եկեղեցին դարձրել է բիզնեսի միջոց»։
