Փարիզի օդանավակայանում օգոստոսի 24-ի երեկոյան ձերբակալվել է Telegram մեսենջերի 39-ամյա հիմնադիր Պավել Դուրովը, հաղորդում են ֆրանսիական լրատվամիջոցները, այդ թվում՝ TF1/LCI-ն և BFMTV-ն ։
Պավել Դուրովը շաբաթ օրը տեղական ժամանակով մոտ 20:00-ին (Մոսկվայի ժամանակով 21:00-ին) ձերբակալվել է ֆրանսիական Լե Բուրժե օդանավակայանի թռիչքուղուց: Ձերբակալությունն իրականացվել է օդային տրանսպորտի ժանդարմերիայի աշխատակիցների կողմից այն բանից հետո, երբ գործարարը իջել է իր անձնական ինքնաթիռից, հայտնում է TF1-ը։
Դուրովը Ֆրանսիա է մեկնել Ադրբեջանից, որտեղ, ըստ լրատվամիջոցների , եղել է ՌԴ նախագահ Վլադիմիր Պուտինի հետ միաժամանակ։ Լե Բուրժեում գործարարին ուղեկցել են թիկնապահն ու անհայտ կին, գրում է TF1-ը։
BFMTV-ն Դուրովի Ֆրանսիայում հայտնվելը անվանում է « հանելուկային »: TF1-ի զրուցակցի խոսքով՝ Telegram-ի հիմնադիրը «գիտեր, որ ինքը պերսոնա նոն գրատա է» այս երկրում և փորձել է խուսափել Եվրոպա այցելություններից, հատկապես այն երկրներ, որտեղ մեսենջերը հսկվում է անվտանգության ուժերի կողմից՝ փոխարենը նախընտրելով ուղևորություններ կատարել ԱՄԷ, նախկին Խորհրդային հանրապետություններ կամ Հարավային Ամերիկա:
Դուրովը կարող էր չնախատեսված կանգառ կատարել Փարիզում՝ վառելիքի բացակայության պատճառով, ենթադրում է ֆրանսիական LCI հեռուստաալիքի լրագրող Սիրիլ Ամուրսկին ։ Ըստ նրա՝ ձեռնարկատերը չի կարող ապաստան խնդրել, քանի որ Ֆրանսիայի քաղաքացիություն ունի 2021 թվականինից։
Ֆրանսիայում Դուրովը ներառվել է հետախուզման մեջ գտնվող անձանց ցուցակում, հայտնում է TF1-ը։ Նրան կալանավորելու որոշում է կայացրել Դատական ոստիկանության ազգային վարչությունը նախաքննության շրջանակներում։ TF1-ի աղբյուրը հայտնում է, որ Ֆրանսիական իրավապահ մարմիններում տրված հրամանը «կգործի միայն այն դեպքում, եթե Պավել Դուրովը գտնվի Ֆրանսիայի տարածքում»:
«Այս երեկո նա սխալվեց: Չգիտենք, թե ինչու… Այս վայրէջքը Ֆրանսիայում պատահական վրիպակ էր, թե՞ մի այլ տեղ ճանապարհին կարճ կանգառ, բայց ամեն դեպքում, մենք նրան մեր կալանքի տակ ենք պահում», – ասել է իրավապահ մարմինների աշխատակիցը։
Ֆրանսիայի մաքսային վարչության (ONAF) խարդախության դեմ պայքարի ազգային գրասենյակը Դուրովին կալանքի տակ է պահելու մինչև պաշտոնական մեղադրանք ներկայացնելը, որը սպասվում է կիրակի օրը՝ օգոստոսի 25-ին: Գործարարը շուտով կարող է հայտնվել դատարան։
Դուրովը դժվար թե հետաքննության ընթացքում ազատ արձակվի կալանքից, քանի որ նա ունի փախուստի բավական միջոցներ և հնարավորություններ, նշում է TF1-ի զրուցակիցը։
«Պավել Դուրովն անպայման կհայտնվի կալանավայրում», – հեռուստաալիքին ասել է հետաքննությանը մոտ կանգնած աղբյուրը։ Պաշտոնապես Ֆրանսիայի իրավապահ մարմինները չեն հայտնել Դուրովին կալանավորելու մասին։ Փարիզի ոստիկանության պրեֆեկտուրան «դեռ չի հաստատել» ձեռնարկատիրոջ ձերբակալության մասին տեղեկությունը, հայտնում է ՏԱՍՍ-ը ։
ՌԴ ԱԳՆ-ն հայտնել է, որ Ֆրանսիայում ՌԴ դեսպանատունը «անհրաժեշտ քայլեր» է ձեռնարկել Դուրովի շուրջ ստեղծված իրավիճակը պարզաբանելու համար՝ «չնայած գործարարի ներկայացուցիչների բողոքարկման բացակայությանը»։
Ինչում է Դուրովին կասկածում.
Ֆրանսիայի իրավապահ մարմինները Դուրովին համարում են Telegram-ի միջոցով կատարված հանցագործությունների հանցակից։ Այսպիսով, նա կասկածվում է «թմրամիջոցների ապօրինի շրջանառության, երեխաների դեմ հանցագործությունների և խարդախության» մեջ, հայտնում է TF1-ը։ Հեռուստաալիքի աղբյուրը պնդում է, որ, ըստ անվտանգության պաշտոնյաների, Telegram-ը երկար տարիներ եղել է կազմակերպված հանցավորության հիմնական հարթակը։
«Նա թույլ տվեց, որ անթիվ հանցագործություններ կատարվեն իր հարթակում և ոչինչ չարեց դա մեղմելու կամ (իշխանությունների հետ) համագործակցելու համար», – ասաց TF1-ի աղբյուրը:
Դուրովի դեմ բողոքների թվում, մասնավորապես, նշվում են Telegram-ի չաթերի անբավարար չափավորությունը և իրավապահ մարմինների հետ համագործակցելու ցանկություն չունենալը։ Անվտանգության ուժերը հայտնվել են նաև մեսենջերի որոշ գործառույթների ուշադրության կենտրոնում, այդ թվում՝ դրանք, որոնք թույլ են տալիս օգտատերերին կրիպտոարժույթ ուղարկել։
Մեղադրական եզրակացությունը կարող է ներառել ահաբեկչության, թմրամիջոցների ապօրինի շրջանառության, փողերի լվացման, խարդախության, մանկական պոռնոգրաֆիայի տարածման և այլ հոդվածներ, հաղորդում է TF1-ը։ Telegram-ի հիմնադրին Ֆրանսիայում սպառնում է մինչև 20 տարվա ազատազրկում։
Դուրովին կալանավորելը միջոց է ուժային կառույցների աշխատանքը ակտիվացնելու, նրանց գործողությունները ցուցադրելու և հանցագործներին վախեցնելու համար, ովքեր օգտագործում են Telegram-ը իրենց նպատակների համար, TF1-ին ասել է աղբյուրը։ Նրա խոսքով՝ Ֆրանսիայի իշխանությունները ակնկալում են, որ ձեռնարկատիրոջ հետապնդումը թույլ կտա «խառել մրջնաբույնը» և մեծացնել ճնշումը եվրոպական այլ երկրների վրա՝ հասնելու ահաբեկչության մեջ կասկածվողների գաղտնագրված նամակագրությանը:
Ահաբեկչությունից հետո Telegram-ի կիրառման երկրորդ ամենավտանգավոր ոլորտը մանկապիղծների շփումն է, նշել է TF1-ի զրուցակիցը։ Դուրովի ձերբակալության մասին լուրերի ֆոնին Telegram-ում օգտագործվող Toncoin կրիպտոարժույթի արժեքը
նվազել է ավելի քան 15%-ով։
