ՀՀ ԿԳՄՍ նախարարության Պատմամշակութային ժառանգության գիտահետազոտական կենտրոնի եւ Ֆրանսիայի Լյումերի Լիոն 2 համալսարանի համատեղ արշավախումբը Շիրակի երկրագիտական թանգարանի աջակցությամբ հետախուզական պեղումներ է կատարել Երերույքի տաճարի ներսում: Շիրակի մարզի Անիպեմզա ավանի մոտ գտնվող վաղքրիստոնեական-վաղմիջնադարյան (4-5-րդ դարեր) այս կիսավեր եզակի հուշարձանում աշխատանքներն իրականացվել են նրա բարեկարգման եւ ամրակայման ծրագրի շրջանակներում: Փորված խուզահորերի տարածքում բացվել է հիմնաժայռը, հայտնաբերվել են խեցեղենի սակավաթիվ բեկորներ: Տաճարի տարածքում եւ հարակից հատվածներում իրականացվել են նաեւ սկանավորման ու մշտադիտարկման աշխատանքներ:
Ինչպես կազմակերպությունից տեղեկացնում են, կառույցի ամրակայման աշխատանքները մեկնարկել են այս տարվա ապրիլ-մայիս ամիսներին եւ ինտենսիվ կերպով շարունակվում են այս օրերին: Տաճարի հիմքերի ամրացումն իրականացվում է կենտրոնի պատվերով, ԱՄՆ դեսպանների մշակութային արժեքների պահպանության հիմնադրամի տրամադրած դրամաշնորհով: Նախագծումը ԿԳՄՍ նախարարության պատվերով իրականացրել է Հայաստանի ճարտարապետության եւ շինարարության ազգային համալսարանը: Աշխատանքների ներկա փուլի ավարտը նախատեսված է հոկտեմբեր ամսին:
Այս ամիսներին հանրապետությունում կենտրոնի մասնագետների ծավալած աշխատանքները ներառում են Լոռու մարզի Լոռի Բերդ ամրոցի եկեղեցու վերականգնման շինարարությունն ու նույնանուն քաղաքատեղիի մեծ բաղնիքի ջրամատակարարման համակարգի պեղումները, Ամրակից գյուղի Սուրբ Նիկողայոս եկեղեցու վերականգնումը, Արագածոտնի մարզի Օհանավանի նորահայտ դամբարանի պեղումները, Սյունիքի մարզի Սվարանց, Տանձատափ, Հալիձոր, Հարժիս, Տաթեւ գյուղերում կատարած հնագիտական ուսումնասիրությունները, տարբեր եկեղեցիների տարածքների մաքրման եւ այլ գործեր: Իրականացվում են նաեւ ուսուցողական ու այլ բնույթի միջոցառումներ: Հունիսին կենտրոնի հնագիտական գտածոների վերականգնման բաժնում իրենց ուսումնական պրակտիկան են անցկացրել Հայաստանի գեղարվեստի պետական ակադեմիայի «կիրառական արվեստ» մասնագիտության 1-ին կուրսի ուսանողները:
Վերջում ի դեպ նշենք լեզվական տարածում գտած խնդիրներից մեկի մասին, որից, ցավոք, չի խուսափել նաեւ «Պատմամշակութային ժառանգության գիտահետազոտական կենտրոն» ՊՈԱԿ-ը: Նրա այս անվան բոլոր բառերը կազմակերպության ֆեյսբուքյան էջի ճակատին (վերնագրում) գրված են մեծատառ, ինչը դեմ է հայոց լեզվի կանոններին: Ըստ ամենայնի դա գիտեն նաեւ էջը գրողները, որովհետեւ հաղորդագրությունների տեքստերում գրում են ճիշտը, առանց ավելորդ մեծատառերի: Ուրեմն ինչո՞ւ նման մասնագիտական կազմակերպությունը տուրք տա սխալ լեզվական «մոդային»:
ԳԵՂԱՄ ՄԿՐՏՉՅԱՆ
