Օրերս Դորտմունդի «Մենք» երիտասարդական միության հերթական նախաձեռնությունն էր։ Այս անգամ հայկական կազմակերպությունը հյուրընկալել էր հեքիաթագիր Արփի Մաղաքյանին, որը քաղաքի հայությանը ներկայացրեց իր վերջին հրատարակությունները` «Արտավազդ արքայի հեքիաթը» եւ «Տիգրան Մեծ արքայի հեքիաթը» աշխատությունները։
Շնորհանդեսը հիանալի հնարավորություն է` գերմանահայությանը ծանոթացնելու մեր կողքին ապրող եւ ստեղծագործող, ժամանակակից հայ գրողի աշխատություններին, որոնք բավականին մեծ արձագանք են գտել հայ ընթերցողական շրջանակներում, հանրության մեջ սեր արթնացնել դեպի ընթերցանությունը եւ, ըստ այդմ, նպաստել հայապահպանությանն ու հայ ինքնության պահպանմանը։
Այդ հնարավորությունը հավուր պատշաճի օգտագործեց եւ լավագույնս վայելեցին Դորտմունդի հայությունը, միջոցառմանը ներկա ավագ ու կրտսեր հանդիսատեսները, ովքեր ոչ միայն մեծագույն հետաքրքրությամբ ու բավականությամբ էին ունկնդրում հեղինակին, այլեւ անմիջական մասնակցություն էին ունենում ողջ շնորհանդեսի ընթացքին։ Արփի Մաղաքյանի ներկայացումն այնքան տպավորիչ էր, որ հանդիսատեսի համար հնարավորություն ստեղծվեց գրեթե անմիջականորեն ծանոթանալ գրքի գլխավոր կերպարներին եւ ավելին իմանալ Արտաշեսյան թագավորական տոհմի մասին:
Ինտերակտիվ շնորհանդեսի ողջ ընթացքում հեղինակին ուղղված հարցերը չէին դադարում։ Իսկ Մաղաքյանի պատասխաններն ավելի մեծ հետաքրքրասիրություն էին առաջացնում հանդիսատեսի մոտ` դեպի հեքիաթների կախարդական աշխարհը, դրանց ստեղծման գաղտնիքները:
«Մենք» միության ղեկավարներից Հունան Եղոյանի խոսքերով` «Արփին իր էությամբ լի է անսահման ջերմությամբ ու լույսով, որոնք նա փոխանցում է շրջապատին։ Այս շնորհը ոչ բոլորին է տրված: Ուստի հեղինակը պետք է հաճախ հանդիպումներ ունենա Սփյուռքում բնակվող մեր հայրենակիցների հետ, մի բան, որը չափազանց կարեւոր է հայ համայնքների համար»:
Գերմանաբնակ Անի Բոշիկյանն իր հերթին իր գոհունակությունը հայտնեց գրողի հետ ծանոթանալու համար: «Մեր գրադարանը համալրվեց եւս երկու հիանալի գրքերով»,- իր խոսքում նշեց Բոշիկյանը։
Գրքի հեղինակը խորին շնորհակալություն հայտնեց ջերմ ընդունելության համար։ «Դժվարություններն ու հոգնածությունը չքվում են, երբ մտնում ես մի սրահ, որտեղ հայի գեղեցիկ ու խոսուն աչքերն են»,- նշեց Մաղաքյանը` հավելելով,- «Այդ աչքերում այնքան կարոտ կա, այնքան բառեր կան չասված… այնքան հայրենիքի, արմատի մասին նորն իմանալու ցանկություն կա»։
Հանդիպումն առիթ հանդիսացավ, որպեսզի գրողի ու հայկական կազմակերպության միջեւ համագործակցության նոր առաջարկներ ծնվեն, որոնք, անշուշտ, կյանքի պիտի կոչվեն առաջիկայում։
Վերջում նշենք, որ Արփի Մաղաքյանը բնակվում է Հայաստանում։ Նրա գրքերը` «Երեւանյան հեքիաթներ» (2019), «Արեւի համբուրած Շուշին» (2022), «Արտավազդ արքայի հեքիաթը» (2023) եւ «Տիգրան Մեծ արքայի հեքիաթը» (2024), վաճառվում են հայաստանյան գրախանութներում։
Բեղուն գրիչ ցանկանանք մեր հայրենակցուհուն եւ նորանոր աշխատությունների ծնունդ։
«Մենք» երիտասարդական միություն
Դորտմունդ, Գերմանիա
