Մինսկում մեկնարկել է բռնցքամարտի Եվրոպայի հերթական առաջնությունը, որի պարգեւները վիճարկողների թվում են նաեւ Հայաստանի 7 ներկայացուցիչներ: Նրանցից մեկըՙ մինչեւ 64 կգ քաշային Արա Պուլուզյանն արդեն դուրս է մնացել մեդալների համար մղվող պայքարից: Արան առաջին մենամարտում հաղթեց Բելառուսի ներկայացուցիչ Ռուստամ Աձինաեւին, սակայն հաջորդ մենամարտում պարտվեց մոլդովացի Դմիտրի Գալագոտին:
Հաղթանակով մեկնարկեց մինչեւ 75 կգ քաշային կարգում հանդես եկող Արման Հովնիկյանը, որը պարտության մատնեց ադրբեջանցի Էլնուր Սուլեյմանովին: Մեր մյուս 5 բռնցքամարտիկները դեռեւս ռինգ դուրս չեն եկել:
Ռուսաստանը ներկայացնող Արմեն Զաքարյանը (64 կգ) հաջողությամբ հաղթահարեց շոտլանդացի Ջոշ Թեյլորի դիմադրությունը: Գերմանիան ներկայացնող Արտյոմ Հարությունյանը (64 կգ) 2 հաղթանակ է տոնել Շվեդիան ներկայացնող Կլարենս Գոյերամի եւ լատվիացի Արթուրս Ահմետովսի նկատմամբ: Գերմանիայի դրոշի ներքո հանդես եկող Արայիկ Մարությանն էլ (69 կգ) պարտության մատնեց Սլովենիայի ներկայացուցիչ Ալեքս Կույավեցին: Հաջող է մեկնարկել նաեւ Բելառուսը ներկայացնող Վազգեն Սաֆարյանը (60 կգ), որը պարտության է մատնել ֆինն Անտի Սեպալային:
