«Արմենպրես»
Հայաստանում ստեղծվել է աշխարհում առաջին բաս քանոն երաժշտական գործիքը: Այս մասին այսօր լրագրողների հետ հանդիպման ժամանակ հայտնեց երաժիշտ Արա Գեւորգյանը: Գաղափարը երաժշտի մոտ առաջացել է տարիներ առաջ, երբ քանոնահարուհի Հասմիկ Լեյլոյանի հետ պատրաստել են մի ստեղծագործություն 50 քանոնով: «Զգացի, որ ինչ-որ բան պակասում է այդ ստեղծագործությանը, չկար բասային ֆունկցիան»,-«Արմենպրես»-ի հաղորդմամբ` նշեց Արա Գեւորգյանը: Ցանկալի արդյունքին հասան` համակարգչի օգնությամբ հնչողությունը կարգավորելով: Հենց այդ ժամանակ էլ երաժշտի մոտ միտք հղացավ նոր ազգային բասային գործիք ստեղծել, քանի որ մինչ այդ բասային ֆունկցիան կատարում էր կոնտրաբասը: «Մտածեցի` ինչու չունենանք մեր ազգային բասային նվագարանն ու դիմեցի ազգային նվագարաններ պատրաստող վարպետ Ալբերտ Զաքարյանին, ով էլ մեծ պատրաստակամությամբ հանձն առավ գործիքի պատրաստման դժվարին գործը»,- ասաց Արա Գեւորգյանը:
Արդեն պատրաստ է աշխարհում առաջին ազգային բաս քանոնը, որը պատրաստված է Սոչիի թխկու փայտից, կոնտրաբասի լարերից եւ իր կառուցվածքով նման է քանոնի: Գործիքի ինքնարժեքը բավականին թանկ է, մոտ 1000 դոլարին համարժեք դրամ, որի մեծ բաժինը կազմում է կոնտրաբասի լարերի գումարը: Այդ իսկ պատճառով, ինչպես նշում են Արա Գեւորգյանն ու Ալբերտ Զաքարյանը, նախատեսվում է հատուկ բաս քանոնի համար լարեր արտադրելու խնդրանքով դիմել համապատասխան կազմակերպությանը:
Մայիսի 29-ին գրանցվել է բաս քանոնի գյուտը վարպետի` Ալբերտ Զաքարյանի անունով, քանի որ ինչպես Արա Գեւորգյանն է հաստատում, գործիքի նախագծումն ու կառուցումը կատարվել է հենց վարպետի կողմից ութ ամսում: Պատրաստվում է երկու գործիք. մեկը, որն արդեն պատրաստ է, պատկանելու է Խ. Աբովյանի անվան պետական մանկավարժական համալսարանին, որով դասավանդելու են քանոնահարուհիներին: Երկրորդը նվիրվելու է Թովմաս Պողոսյանի գլխավորած «Ազգային նվագարանների պետական նվագախմբին: Գործիքներն ունենալու են իրենց անունները: Նախաձեռնողները որոշել են գործիքները կնքել հա յ կանանց անուններով: Առաջին գործիքի անունն է Ալվարդ, որը վարպետի հարսի անունն է: Երկրորդ գործիքը կունանա այն բարերարի կնոջ անունը, ով կհովանավորի գործիքի ստեղծման ծախսերը:
Նախաձեռնողները նախատեսում են առաջիկա 10 օրվա ընթացքում գործիքը ներկայացնել հանրությանը գեղեցիկ կազմակերպված շոուի միջոցով` քանոնահարուհիների, պարային խմբերի մասնակցությամբ:
