Մենք հանդիպման առաջարկ արել ենք, առաջարկը եղել է մեր մեթոդաբանությամբ կոնկրետ ձևաչափով հանդիպում կազմակերպելը. լրագրողների հետ զրույցում հայտնեց ՄԻՊ Անահիտ Մանասյանը՝ պատասխանելով Բագրատ Սրբազանի հետ հանդիպման մասին հարցին։
«Երբեք չեմ խուսափում քաղաքացիների, լրագրողների հետ հանդիպումից և այս փուլում էլ պատրաստ եմ մեզ վերաբերելի մեթադաբանությամբ ու ձևաչափով ունենալ հանդիպում: ՄԻՊ-ը քաղաքացիների հետ ընդունելության հստակ մեթոդաբանություն ունի և այդ մեթոդաբանությունը կոնկրետ սկզբունքներով է գործում։
Իմ հանրային կապերի պատասխանտուն այնտեղ է եղել, ասել է, որ այս պահին էլ ՄԻՊ-ը պատրաստ է ընդունել, այսինքն հերթագրման հետ կապված խնդիր չենք ունեցել, պարզապես քաղաքացիների հետ երբևէ որևէ քննարկում կամ հաղորդակցություն, որը վարում ենք, այլ քաղաքացիների ներկայությամբ չի լինում»,- ասաց Անահիտ Մանասյանը:
«Պետական մարմիններից ընդհանրապես հրահանգ չեմ ստանում։ Որևէ իրավիճակում, որևէ ցուցում պետական մարմիններից չեմ ստացել, ինչը շատ կարևորում եմ։
Այս խնդրի վերաբերյալ ևս որևէ տեսակի քննարկում չի եղել»,- ասել է Մանասյանը՝ վստահեցնելով, որ Բագրատ Սրբազանին չհանդիպելու համար պետական մարմիններից հրահանգ չի ստացել:
