Ֆուտբոլի ՀՀ ազգային հավաքականի հարձակվող Արթուր Սարկիսովիՙ Նիժնի Նովգորոդի «Վոլգայում» վարձավճարով հանդես գալու ժամկետը լրացել է: «Սպորտ Էքսպրեսի» թղթակցի հետ զրույցում Սարկիսովը տեղեկացրել է, որ հունիսի 1-ին վերադառնալու է Մոսկվայի «Լոկոմոտիվ», որին են պատկանում ֆուտբոլիստի տրանսֆերային իրավունքները: Նա շուտով կժամանի Երեւանՙ ազգային հավաքականի կազմում նախապատրաստվելու հունիսի 7-ին եւ 11-ին Մալթայի ու Դանիայի հավաքականների հետ կայանալիք ընտրական մրցախաղերին:
Արթուր Սարկիսովը ֆուտբոլով սկսել է զբաղվել 12 տարեկանից, իսկ մինչ այդ թեթեւ ատլետիկայով է պարապել: Ֆուտբոլիստը նշել է, որ թեթեւ ատլետիկայի շնորհիվ ինքը տիրապետում է մեծ արագության, ինչն օգնում է խաղերի ժամանակ շրջանցելու մրցակիցներին ու մենմենակ հայտնվելու դարպասապահների դիմաց:
