Մուրսին եւ նրա գլխավոր զինակիցները ձերբակալված են
Երեկվա համարում «Ազգը» գրել էր Եգիպտոսում տեղի ունեցած զինվորական հեղաշրջման մասին: Հուլիսի 4-ի առավոտյան Եգիպտոսի զինվորական հրամանատարությունը պաշտոնապես հայտարարեց, որ նախագահ Մուհամմեդ Մուրսին պաշտոնանկ է արված եւ ձերբակալված է: Նրան տարել են պաշտպանության նախարարության շենք եւ շուտով կարող են ներկայացնել մեղադրանքներ:
«Ալ Ահրամ» թերթի տվյալներով, զինվորական ղեկավարությունը Մուրսիին առաջարկել է տարագրվել Թուրքիա, Քաթար կամ որեւէ այլ երկիր (իր ընտրությամբ), բայց տապալված նախագահը հրաժարվել է լքել Եգիպտոսը:
Նաեւ հաղորդվում է, որ հուլիսի 3-ի ուշ երեկոյան Մուրսիի կողմնակիցների եւ հակառակորդների բախումների ժամանակ սպանվել է առնվազն 32 մարդ, այդ թվումՙ իրավապահ մարմինների 4 աշխատակից: Կան հարյուրավոր վիրավորներ:
Կահիրեում հուլիսի լույս 4-ի գիշերը կատարվել են մի շարք ձերբակալություններ: Կալանավորվել են նախկին վարչապետ Իշամ Կանդիլը, «Մուսուլման եղբայրներ» շարժման գերագույն առաջնորդ Մուհամմեդ Բադիան, նրա տեղակալ Ռաշադ ալ Բայումին եւ «Ազատության եւ արդարության կուսակցության» առաջնորդ Սաադ ալ Կատատնին: «Մուսուլման եղբայրների» ավելի քան 300 ներկայացուցիչների ձերբակալման կարգադրություններ են արվել: Սկզբնական փուլում նրանց հավանաբար կներկայացվեն բանտերից փախչելու կամ նման փախուստներին օժանդակելու մեղադրանքներ:
Եգիպտոսի նախագահի պաշտոնակատար է նշանակվել Բարձրագույն սահմանադրական դատարանի ղեկավար Ադլի Մանսարը: Հուլիսի 4-ին նա երդում է տվել: 67-ամյա Ադլի Մանսուրը նախագահի պաշտոնը կզբաղեցնի անցման ժամանակաշրջանումՙ մինչեւ նոր ընտրությունների անցկացումը: Այդ մասին ազգին ուղղված հեռուստաելույթում հայտարարել է պաշտպանության նախարար Աբդել Ֆաթահ աս Սիսին: Նա ընդգծել է, որ բանակը մտադիր չէ ստանձնել երկրի քաղաքական ղեկավարումը: Գեներալ աս Սիսին բնակչությանը կոչ է արել կարգուկանոն պահպանել:
Ադլի Մանսուրը 45-ամյա ստաժով իրավաբան է: Սովորել է Եգիպտոսում եւ Ֆրանսիայում: 20 տարուց ավելի աշխատել է Բարձրագույն սահմանադրական դատարանում: Քաղաքական հայացքներով չափավորական է, որպես քաղաքական գործիչ անցյալում աչքի չի ընկել, նախագահության թեկնածու չի առաջադրվել: 2012-ին մասնակցել է նախագահական ընտրություններին վերաբերող նոր օրենքի մշակմանը, որի շնորհիվ «Մուսուլման եղբայրները» տիրեցին իշխանությանը: Սահմանադրական դատարանի ղեկավար է նշանակվել Մուրսիի կարգադրությամբ:
Բուն Եգիպտոսում իրադրությունը մնում է լարված: Մուրսիի տապալման լուրի հրապարակումից հետո Կահիրեի Թահրիր հրապարակում ժողովուրդը ցնծության մեջ էր: Միեւնույն ժամանակ տարբեր վայրերում շարունակվում էին «Մուսուլման եղբայրների» կողմնակիցների եւ հակառակորդների բախումները: Ֆրանսպրեսի տվյալներով, միայն Ալեքսանդրիայում, Մարսա Մատրուհում, Մինյեում, Ֆայյումում եւ այլ քաղաքներում առնվազն 10 մարդ է սպանվել, հարյուրավոր ուրիշներ վիրավորվել են: Եգիպտոսում վերջին 1 շաբաթվա զոհերի ընդհանուր թիվը մոտ 100 է:
Եգիպտոսում կատարված իշխանափոխությունը ողջունել են Սաուդյան Արաբիայի թագավորը եւ Արաբական Միացյալ Էմիրությունների ղեկավարությունը: ԱՄՆ-ի նախագահ Բարաք Օբաման եգիպտացի զինվորականներին հորդորել է իշխանությունը փոխանցել ժողովրդավարական ձեւով ընտրված քաղաքացիական կառավարությանը եւ թույլ չտալ «Մուսուլման եղբայրների» առաջնորդների անօրինական ձերբակալություններ: Ռուսաստանը Եգիպտոսի բոլոր քաղաքական ուժերին կոչ է արել «զուսպ» լինել եւ մնալ «ժողովրդավարական» շրջանակներում: Նման հայտարարությամբ հուլիսի 4-ին հանդես է եկել ՌԴ արտգործնախարարությունը, հաղորդում է «Ֆիգարո» թերթի կայքէջը: Ինչ վերաբերում է Իսրայելին, այդ երկրի կառավարությունը առայժմ ձեռնպահ է մնում Եգիպտոսի իրադարձություններին առնչվող մեկնաբանություններից:
