Մինչ մերոնք` նախարարներով, պատգամավորներով եւ մյուսներով զբաղված են Վերահսկիչ պալատի հաշվետվության փոխպարզաբանումներով, Հայաստանի սրտում, Ազգային ժողովում հանդես է գալիս ադրբեջանական լոբբիինգի ներկայացուցիչ մի տիկին եւ խոսում «ադրբեջանական 20 տոկոս գրավյալ տարածքներից», «Խոջալուի ցեղասպանություն իրականացրած հայերից». Հայաստանին ագրեսոր կոչում: Այս տիկինը, պատկերացրեք, Մոլդովայի ներկայացուցիչ մի փաստաբան էր` Աուրելիա Գրիգորիու անունով: Սա տեղի է ունեցել հայոց խորհրդարանում ընթացող համաեվրոպական համաժողովի ընթացքում, երբ մոլդովացի տիկին փաստաբանը ելույթ էր ունենում սառեցված հակամարտությունների գոտում մարդու իրավունքների վերաբերյալ իր զեկույցում: Պատկերացրեք` նրան ծափահարողներ եղան խորհրդաժողովականներից: Իհարկե, նրան անմիջապես պատասխանեցին: Նախ դա արեց եվրոպական կառույցներում երկար ժամանակ Հայաստանի պատվիրակության կազմում աշխատած ԱԺ փոխխոսնակ Հերմինե Նաղդալյանը , որն անմիջապես խոսք վերցրեց եւ մոլդովացի փաստաբանուհուն զգուշացրեց` միջազգային խորհրդաժողովն ու հայոց պառլամենտի ամբիոնը կեղծ տեղեկատվություն տարածելու համար չօգտագործել եւ ուրիշների պատվերներ չիրականացնել. «Ես կարծում եմ, որ այստեղ ներկա բարձրաստիճան հյուրերը պետք է անպայման իրենց անհամաձայնությունը հայտնեն, որ գիտական կոնֆերանսը որոշ մարդիկ փորձում են վերածել անթույլատրելի քննարկման: Այսպիսի հարցի քննարկումներ տեղի են ունենում այնպիսի լսարանում, որտեղ կան մասնագետներ, ովքեր տիրապետում են թեմային, իսկ հայտարարել, որ այստեղ կամ այնտեղ ցեղասպանություն է եղել, շատ նման է մեր հարեւանների կողմից ամեն օր հնչող միօրինակ հայտարարություններին: Ես գտնում եմ, որ տիկին փաստաբանը պետք է ավելի կոռեկտ լիներ իր արտահայտությունների մեջ», ասաց մեր խորհրդարանի փոխխոսնակը: Մոլդովացի տիկինը փորձեց արդարանալ, թե պատվեր չի կատարում, հակամարտության մանրամասների մեջ էլ չի ուզում խորանալ, այլ միայն սառեցված հակամարտությունների գոտում մարդու իրավունքների ոտնահարումից էր ուզում խոսել: Լիտվայի մարդու իրավունքների պաշտպանն այստեղ խառնվեց, թե Մոլդովայի սառեցված հակամարտությունից բա ինչու չի խոսում մոլդովացի փաստաբան տիկինը, իսկ ղարաբաղյան հակամարտության վերաբերյալ նրա անդրադարձի ոչ տեղն է ճիշտ ընտրված, ոչ ժամանակը:
Նրան միացավ մեր Սահմանադրական դատարանի նախագահ Գագիկ Հարությունյանը ` առաջարկելով դադարեցնել քննարկումը եւ նույնիսկ ընդհատելով իրեն ընդհատել փորձող փաստաբանուհուն` նրան հարգանք տածելու հրավիրելով ուրիշների կարծիքը եւս լսելու:
Այսպիսի «Իրավունքի գերակայության եվրոպական չափորոշիչները եւ իշխանությունների հայեցողության սահմանները Եվրոպայի խորհրդի անդամ երկրներում» համաեվրոպական խորհրդաժողով: Ադրբեջանական խավիարը, փաստորեն հասավ Երեւան, ու Հայաստանի սրտում անգամ դրսեւորվեց Ն. Զոհրաբյանի ասած նավթային դոլարների ողջ փայլը: Իսկ մերոնք հազիվ ֆեյսբուքյան լրտեսական սկանդալ են բացահայտում:
Բայց դե այդ` համաեվրոպական խորհրդաժողովը երեկ շարունակվում էր, եւ լուրջ-լուրջ քննարկեց բարդ-բարդ թեմաներ դատական եւ սահմանադրական վերահսկողության աշխարհի փորձից, իրավունքի գերակայության եւ օրենսդիրի հայեցողության սահմաններից խոսեցին այնտեղ, դեռ վերջում էլ ընդհանուր թեմայի վերաբերյալ հուշագիր ընդունեցին:
Վերը կատարվածին մերոնց լրջորեն անդրադարձի կարիքը կա փաստորեն` հետեւություններ անելու հրամայականով:
