Արարատյան դաշտում շուրջ 700 անօրինական հորեր կան
Ջրային ռեսուրսների անարդյունավետ օգտագործման հետեւանքով վնասների հաշվարկման նպատակով երեկ կառավարության որոշմամբ ապօրինի օգտագործվող ստորերկրյա 1 խմ ջրի արժեքը սահմանվեց 15 դրամ, իսկ 1 խմ մակերեւութային ջրի արժեքը` 5 դրամ: Խնդրին անդրադարձավ վարչապետ Տիգրան Սարգսյանըՙ բնապահպանության նախարարության ուշադրությունը հրավիրելով տնտեսվարող սուբյեկտների հանդեպ խստագույն վերահսկողություն սահմանելու անհրաժեշտության վրա:
Վարչապետը տեղեկացրեց, որ մի մեծ գործընթաց են սկսել Արարատյան դաշտավայրում ջրերի արդյունավետ օգտագործումն ապահովելու առումով, քանի որ ահազանգեր են ստացվել բնապահպանական տարբեր կազմակերպություններից Արարատյան դաշտում ստեղծված շատ լարված իրավիճակի մասին: «Համայնքները դիմում են մեզ` նկարագրելով, որ իրենք զրկվում են ե՛ւ խմելու ջրից, ե՛ւ ոռոգման ջրից այն պատճառով, որ խորքային ջրերի մակարդակը նվազում է: Մենք այստեղ անհապաղ միջամտելու անհրաժեշտություն ունենք», ասաց Տիգրան Սարգսյանըՙ տեղեկացնելով, որ այդ խնդրի վերաբերյալ ստեղծվել է միջգերատեսչական հանձնաժողով փոխվարչապետի գլխավորությամբ: «Հանձնաժողովը մեզ պետք է ներկայացնի երկարաժամկետ, կարճաժամկետ, միջնաժամկետ միջոցառումների ծրագիր, որպեսզի մենք անհապաղ այս բնագավառում կարգուկանոն հաստատենք: Մասնավորապես, խոսքը խորքային հորերի մասին է, որոնք անօրինական ձեւով են իրականացվել, եւ այսօր մենք ունենք ջրի մեծ գերածախս, եւ դա կարող է Արարատյան դաշտում ուղղակի աղետալի իրավիճակ ստեղծել, որովհետեւ մի քանի հարյուր ձկնաբուծական տնտեսություններ ունենք, որոնք վաղը նույնպես կանգնելու են պրոբլեմի առջեւ, ջրային ռեսուրսներ չեն լինելու, որպեսզի նրանք իրենց տնտեսությունները կարողանան զարգացնել: Միեւնույն ժամանակ մենք ունենք շուրջ 700 անօրինական հորեր, որոնք այսօր գործում են, այս խնդիրը պետք է հրատապ լուծենք եւ այս բնագավառում կարգուկանոն հաստատենք», եզրափակեց վարչապետը:
