Մերօրյա իշխանավորները փաստացի երկյուղ եւ դող ունեն Արցախ բառից, առավել եւս՝ Արցախյան առաջին պատերազմի մասնակիցներից: Այն աստիճան, որ անգամ մահացած մարդուց են վախենում, հրաժարվում՝ հավուր պատշաճի կազմակերպել պետականության կայացման գործում ներդրում ունեցած անհատի վերջին հրաժեշտի արարողությունը: Օրեր առաջ են հողին հանձնել Արցախյան ազատագրական պայքարի մասնակից, ռազմահայրենասիրական երգերի անզուգական կատարող Սահակ Սահակյանին: Պարզվում է՝ Կամերային երաժշտության ազգային կենտրոնի տնօրենությունը մերժել է իր հարկի տակ հրաժեշտ տալ Սահակ Սահակյանին: «Վերեւից արգելում են»,- պատճառաբանել են Կամերայինից:
Բայց սա դեռ ամենը չէ: «Ազգ»-ի տեղեկություններով՝ Քաղաքային իշխանությունները մերժել են Սահակ Սահակյանին հուղարկավորել Երեւան համայնքի գիտության եւ մշակույթի գործիչների պանթեոնում՝ Թոխմախում: «Կոչում չունի, տեղն էլ քիչ է». նրա հարազատներին այսպես են պատճառաբանել: Բայց ամենասոսկալին այն է, որ նման պատասխան է տվել նաեւ պաշտպանության նախարարությունը: «Նրա ցանկությունը Եռաբլուրում հուղարկավորելվել էր՝ մարտական ընկերների կողքին: Դա էլ են մերժել»,- «Ազգ»-ի հետ զրույցում ասաց Սահակ Սահակյանի ընտանիքի անդամներից մեկը:
ՍԵՎԱԿ ՎԱՐԴՈՒՄՅԱՆ
