Հենրիխը կարիերան կշարունակի Դորտմունդի «Բորուսիայում»
Երկարատեւ եւ հուզումնալից սպասումներից հետո Հենրիխ Մխիթարյանի տեղափոխության հարցը վերջապես իր հանգուցալուծումը գտավ: Երեկ վաղ առավոտյան Հենրիխը «Զվարթնոց» օդանավակայանից Երեւան-Վիեննա չվերթով ուղեւորվել է Դորտմունդ, որտեղ պետք է պայմանագիր կնքի տեղի «Բորուսիայի» հետ: Ավելի վաղ գերմանական «Բիլդը» տեղեկացրել էր, որ «Բորուսիայի» գլխավոր տնօրեն Հանս Յոահիմ Վատցկեն եւ մենեջեր Մայքլ Ցորկը հանդիպել են «Շախտյորի» ներկայացուցիչների հետ եւ համաձայնության են եկել Հենրիխ Մխիթարյանի տրանսֆերի հարցի շուրջը: «Բորուսիան» «Շախտյորին» Հենրիխի համար 27,5 մլն եվրո է վճարելու:
Հիշեցնենք, որ «Շախտյորը» Հենրիխի համար 30 մլն եվրո տրանսֆերային գին էր սահմանել: «Շախտյորի» գլխավոր տնօրեն Սերգեյ Պալկինը դեռեւս անցյալ շաբաթ էր հաստատել, որ Դորտմունդի «Բորուսիան» Մխիթարյանի հարցով պաշտոնական առաջարկ է կատարել:
Արդեն հայտնի է, որ Մխիթարյանը «Բորուսիայում» հանդես է գալու 10 համարի մարզաշապիկով: Այդ համարը նախորդ մրցաշրջանում կրում էր թիմի առանցքային ֆուտբոլիստներից մեկըՙ Գերմանիայի հավաքականի կիսապաշտպան Մարիո Գյոտցեն, որը տեղափոխվել է Մյունխենի «Բավարիա»: Թիմի գլխավոր մարզիչ Յուրգեն Կլոպը Մխիթարյանին դիտարկում է որպես Գյոտցեի փոխարինողի:
«Շալկեում», «Դույսբուրգում» եւ «Բոխումում» հանդես եկած ուկրաինացի ֆուտբոլիստ Վլադիմիր Լյուտին կարծիք է հայտնել, որ Մխիթարյանը կգերազանցի Գյոտցեին. «Ստեղծագործ խաղով եւ արագությամբ Մխիթարյանն ու Գյոտցեն համարժեք են: Իհարկե, մի քանի ամիս հարկավոր է, որ նա ընտելանա նոր կյանքին եւ մարզչական մոտեցմանը: Բայց Մխիթարյանը պրոֆեսիոնալ ֆուտբոլիստ է, եւ ամեն ինչ կստացվի: Հնարավոր է, որ նա նույնիսկ գերազանցի Գյոտցեին, որովհետեւ Մարիոն այնքան գոլ չի խփում, որքան Մխիթարյանը:
Չեմ բացառում, որ 2 տարի անց հայ ֆուտբոլիստի տրանսֆերային արժեքը 2 անգամ բարձրանա: Կարծում եմ, որ բունդեսլիգայում գոլ խփելն ավելի հեշտ կլինի, քանի որ Գերմանիայում բաց ֆուտբոլ են խաղում»:
Երեկ երեկոյան հայտնի դարձավ, որ բուժզննում անցնելուց հետո Մխիթարյանը քառամյա պայմանագիր է կնքել «Բորուսիայի» հետ: Տրանսֆերի արժեքը կազմել է 25 մլն եվրո, ինչն ակումբի պատմության մեջ ռեկորդի կրկնությունն է: 2001-ին այդպիսի գումարով «Բորուսիան» «Պարմայից» գնել էր բրազիլացի Մարսիո Ամորոզոյին:
