«Գյումրին` ԱՊՀ 2013 թ. մշակութային մայրաքաղաք» ծրագրի եւ քաղաքի մյուս հյուրերին անգնահատելի ծառայություն կարող է մատուցել այս բնակավայրի նոր` անգլերեն ուղեցույց-քարտեզը, որը պատրաստվել եւ տարվա միջոցառումներից առաջ լույս է ընծայվել ժուռնալիստների «Ասպարեզ» ակումբի նախաձեռնությամբ: Վերջինիս դեռ 2004 թվականին հրատարակած հայերեն քարտեզը, լինելով այս տարիներին հրապարակում եղած քաղաքի երեւի միակ քիչ թե շատ լիարժեք ուղեցույց-քարտեզը, կատարել է իր դերը, բայց անցած տարիների ընթացքում Գյումրիում նաեւ փոփոխություններ են եղել, միաժամանակ մեծացել է դրա այլալեզու հրատարակության պահանջարկը:
Անգլերեն քարտեզում տեղ են գտել Գյումրու բոլոր փողոցները, նրբանցքները, թաղամասերը, առողջապահական հիմնարկները, սպասարկման ծառայությունները, հաստատությունները, մշակութային կենտրոնները եւ այլն, նշվել են քաղաքային ելքերից մինչեւ այլ քաղաքներ ընկած հեռավորությունները, մայրուղիների համարները, Շիրակի մարզի շատ պատմաճարտարապետական եւ բնության հուշարձաններ, առկա է Գյումրի քաղաքից օդային, ավտոմոբիլային, երկաթուղային հաղորդակցության վերաբերյալ անհրաժեշտ տեղեկատվություն եւ այլն:
Քարտեզի հեղինակը` «Ասպարեզ» ակումբի խորհրդի նախագահ Լեւոն Բարսեղյանը, խոստացել է մոտ մեկ ամսից լույս ընծայել դրա ռուսերեն, իսկ սեպտեմբեր-հոկտեմբերին` հայերեն տարբերակները:
