Այսօր Հայ Առաքելական Եկեղեցին նշում է Ծաղկազարդը։ Այս տոնը խորհրդանշում է Քրիստոսի հաղթական մուտքը Երուսաղեմ և նշվում է Սուրբ Զատիկից մեկ շաբաթ առաջ: Տոնն իր արտացոլումն ունի քրիստոնեական պատկերագրության մեջ՝ «Մուտք Երուսաղեմ», «Արմավենյաց տոն», «Ծաղկազարդ» կամ «Ծառզարդար» անվանումներով:
Հայաստանի ազգային պատկերասրահի հավաքածուին պատկանող «Քրիստոսի մուտքը Երուսաղեմ» սրբապատկերում ավետարանական դրվագը ներկայացված է հետևյալ կառուցվածքով. կենտրոնում՝ ավանակի վրա նստած, պատկերված է քաղաքին մոտեցող Քրիստոսը, օրհնող աջը՝ բարձրացրած, մյուս ձեռքում ճյուղեր են։ Տիրոջ կողքին և թիկունքում առաքյալներն են, իսկ առջևում՝ Երուսաղեմի բնակիչները, որոնք իրենց հանդերձներն են փռում գետնին և ոստեր ընծայում: Երուսաղեմը ներկայացված է պարսպապատ քաղաքի և տաճարի տեսքով:
Ըստ Գրիգոր Տաթևացու՝ Երուսաղեմ մտնող Քրիստոսի առջև հանդերձներ փռելը խորհրդանշում է մեղքերի մերկացում և ապաշխարում։ Ձիթենու և արմավենու ոստերի ընծայումը բազմիմաստ է. հնում ձիթենին համարվել է իմաստության, խաղաղության, հաղթանակի և փառքի խորհրդանիշ: Այս տեսարանում դա առաջին հերթին խորհրդանշում է «Հաղթող թագավորի» գալուստը և մահվան հանդեպ Տիրոջ տարած հաղթանակը: Փորձելով չշեղվել կանոնիկ պատկերագրությունից՝ նկարիչը Քրիստոսի մուտքը Երուսաղեմ ներկայացրել է իբրև ժողովրդական տոնախմբություն հիշեցնող ուրախ և ջերմ ընդունելություն:
Անհայտ հայ նկարիչ, 18-րդ դար, Քրիստոսի մուտքը Երուսաղեմ, կտավ, յուղաներկ
