ՄԱԿ-ում Հայաստանի մշտական ներկայացուցիչ, դեսպան Մհեր Մարգարյանի հայտարարությունը ՄԱԿ-ի Անվտանգության խորհրդի «Հակամարտությունների կանխարգելման խթանում. կանանց և երիտասարդների դերի ամրապնդում» թեմայով բաց բանավեճում.
«Կանայք և երիտասարդները հատուկ ներուժ ունեն՝ նպաստելու խաղաղության կառուցմանը և կայուն զարգացմանը: Սակայն կոնֆլիկտային իրավիճակներում ամենաշատն են տուժում դրա հետեւանքներից։ Լեռնային Ղարաբաղի բնակչության շրջափակումը, որը սկսվել է 2022 թվականի դեկտեմբերին և ավարտվել 2023 թվականի սեպտեմբերին՝ խաղաղ բնակչության դեմ ռազմական ուժի կիրառմամբ, ցույց տվեց կանանց և երիտասարդների վրա անհամաչափ ազդեցության մասշտաբները։ Միջազգային հանրության հսկողության ներքո ծրագրված և իրականացված կանխամտածված էթնիկ զտումների այս վառ օրինակը հանգեցրել է ողջ էթնիկ հայ բնակչության համատարած բռնի տեղահանմանը՝ էլ ավելի խորացնելով անհավասարությունը և նրանց խոցելիությունը, ովքեր կրում են բռնության և զրկանքների ծանրությունը:
Համաձայն Amnesty International-ի կողմից 2023 թվականին հրապարակված զեկույցի, Լեռնային Ղարաբաղում առաջին անհրաժեշտության ապրանքների և ծառայությունների մատակարարման խափանումներից ամենաշատն են տուժել փոքր երեխաներ ունեցող ընտանիքները՝ դարձնելով կանանց և երեխաներին շրջափակման հիմնական թիրախը:
Ադրբեջանի կողմից մշտական խախտումները, ներառյալ զինված հարձակումները և ոտնձգությունները Հայաստանի տարածքային ամբողջականության դեմ, ագրեսիվ հռետորաբանության տարածումը և հազարամյա հայկական մշակութային ժառանգության համակարգված ոչնչացումը, կրկին ու կրկին ցույց են տալիս միջազգային իրավունքի նկատմամբ կատարյալ անտեսում, որը նաև դրսևորվում է ձախողումներով, օրինակ՝ նաև 2021-2023 թվականների ընթացքում Արդարադատության միջազգային դատարանի կողմից ընդունված ժամանակավոր միջոցների չկատարմամբ։
Միավորված ազգերի կազմակերպությունը և Անվտանգության խորհուրդը դեռ պետք է ճանաչեն այդ խախտումների լրջությունը և մտածեն դրանց կանխարգելման ձախողման մասին»,- ասվում է դեսպանի հայտարարության մեջ:
