Ռուսաստանը ռուս սահմանապահների՝ «Զվարթնոց» օդանավակայանից դուրս գալու վերաբերյալ Երևանից հարցում չի ստացել

ՀՀ ԱԺ խոսնակ Ալեն Սիմոնյանի հայտարարությունն այն մասին, որ ՌԴ սահմանապահները պետք է դուրս գան «Զվարթնոց» օդանավակայանից, Մոսկվայի կողմից դիտարկվում է որպես պաշտոնական Երևանի ոչ բարեկամական պահվածքի հերթական դրսևորում. այսօրվա  ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան:

«Այդքան էլ պարզ չէ՝ որքանով է ԱԺ խոսնակը պատասխանատու իր բարձրացրած թեմայի համար: Մենք ՀՀ իշխանություններիցայս հարցով  որևէ հարցում չենք ստացել.  հասկանում ենք, որ «Զվարթնոցի» հետ կապված պատմությունը բխում է ռուսաստանցի Դմիտրի Սետրակովի շուրջ ավելի վաղ արված զրպարտություններից: Ես կարող եմ ձեզ վստահեցնել, որ Ռուսաստանի ներկայացուցիչների կողմից ոչ մի անօրինական գործողություններ չեն կատարվել: Մենք միշտ հարգում ենք ինքնիշխան պետությունների ազգային օրենսդրությունը»,- ասել է Մարիա Զախարովան։

Նա այսպիսով անդրադարձել է Նիկոլ Փաշինյանի հետևյալ  հայտարարությունը։
«Ինձ հատկապես անհանգստացնում է Հայաստանում ռուս զինվորների կողմից ռուս դասալիք Դմիտրի Սետրակովի առևանգումը։ Մենք չենք կարող հանդուրժել անօրինական գործողությունները մեր տարածքում։ Հետևանքներ կլինեն, եթե Երևանի պահանջները մնան անպատասխան», – France 24-ին տված հարցազրույցում ասել է Նիկոլ Փաշինյանը։