Իհարկե, ոչ ոքի համար անսպասելի չէր, որ Իլհամ Ալիևը նորից կվերընտրվի Ադրբեջանի նախագահի պաշտոնում։ Ավելին, եթե մաթեմատիկական հաշվարկների մեջ 100 տոկոսը բացարձակ արժեք չլիներ, Ալիևը վստահաբար «կհավաքեր» մինչև անգամ 135 տոկոս ձայներ , Azg.am-ի թղթակցի հետ զրույցում ասաց ադրբեջանագետ Գառնիկ Դավթյանը։
«Ինչո՞ւ հենց 93,9 տոկոս քվեներ. նախ, նպատակ կա միջազգային հնարությանը ցույց տալու, որ Իլհամ Ալիևի վարած քաղաքականության մասով կա հանրային կոնսոլիդացիա։ Երկրորդ, 93 և ավելի տոկոսի պարագայում պարզ է լինում, որ հնարավոր պատերազմական գործողությունների դեպքում Ալիևի կողմից կարճ պահանջ կհնչի՝ «Եթե ինձ եք ընտրել, եկեք և մասնակցեք պատերազմական գործողություններին»։ Սա հասարակության նկատմամբ նաև պահանջատիրական ակտ կլինի»,- ասաց մեր զրուցակիցը՝ հիշեցնելով, որ արտահերթ նախագահական ընտրություններն Ադրբեջանում անցել են լրջագույն խախտումներով։
Գառնիկ Դավթյանի խոսքով՝ քանի որ առաջիկայում ընտրություններ են սպասվում նաև Ռուսաստանում և ԱՄՆ-ում, Ալիևի՝ վերջիններից առաջ ընկնելը պայմանավորված էր այն բանով, որ տարածաշրջանում կարող են նոր մարտահրավերներ առաջանալ։ Հետևաբար, ըստ մեր զրուցակցի, հարկավոր էր, որպեսզի փոքրիկ բռնապետը ոտքը քաղաքական առումով ամրացներ և հետագա իր գործողություններում ունենար հանրային աջակցություն՝ զուտ թվային տեսանկյունից։
«Ինչ վերաբերում է Հայաստանի հետ հնարավոր նոր պատերազմին, ապա այդ շեմը բավական բարձր է՝ իհարկե ոչ այն պատճառով, որ Ալիևը հաղթեց արտահերթ ընտրություններում, այլ որ Հայաստանի Հանրապետությունն ունի կապիտուլացված և անողնաշար քաղաքականություն վարող քաղաքական գործիչներ։ Նրանք Ալիևին տարբեր առիթներով հնարավորություն են տալիս լեգիտիմացնել ուժի միջոցով իր պահնաջների իրականացումը՝ մասնավորապես այսպես կոչված «Զանգեզուրի միջանցքի» և դեպի Նախիջևան ադրբեջանցիների անխոչընդոտ տեղաշարժման մասով»,- ասաց ադրբեջանագետը։
Գառնիկ Դավթյանը միաժամանակ շեշտեց՝ Հայաստանի հետ նոր պատերազմի հավանականությունն այս տարի չի նվազելու, ընդհակառակը՝ 2024-ը մեզ համար լինելու է մարտահրավերներով լի տարի՝ հատկապես Սյունիքի և Տավուշի մարզերի անվտանգության ապահովման մասով։
«Ինչ վերաբերում է դրսի ուժերի հետ համագործակցությանը, ապա Ալիևը, չնայած լրջագույն խախտումներին, վերընտրվել է որպես Ադրբեջանի նախագահ, և նրա հետ միջազգային համագործակցությունը շարունակվելու է։ Բնականաբար, կա տնտեսական բարձր շահերի ֆոն՝ առ Ադրբեջան, կա նաև ընկալում, որ ՀՀ իշխանությունը չունի Ադրբեջանի ագրեսիան զսպող քաղաքականություն»,- ամփոփեց ադրբեջանագետը։
Հիշեցնենք, որ Ադրբեջանում երեկ կայացած արտահերթ նախագահական ընտրություններում նախնական տվյալներով ձայների 93,9 տոկոսով հաղթել է երկրի գործող ղեկավար Իլհամ Ալիևը:
