Ներկայիս Թուրքիայի Մարդինի նահանգի Դերիկի շրջանում եղած հինգ հայկական եկեղեցիներից այժմ կանգուն է մնացել է միայն մեկը` Կարմիր եկեղեցին (Դերա Սոր): Ինչպես հաղորդում է «Արմենպրես»-ը, այս մասին հայտնում է թուրքական evrensel.net լրատվական կայքը: 1650 թ-ին կառուցված եկեղեցին 1915 թ-ի Հայոց ցեղասպանութունից հետո Արեւմտյան Հայաստանում գտնվող բազմաթիվ եկեղեցիների նման 40 տարի շարունակ օգտագործվել է որպես ախոռ:
Կայքը հայտնում է, որ այսօր Դերիկում ընդամենը տարեց մեկ հայ զույգ է մնացել, իսկ բազմաթիվ արհավիրքների դիմացած եկեղեցին այժմ պահպանում եւ հսկում է տեղացի մահմեդական կանանցից մեկը` 60-ամյա Խաթուն Գյորունենը: Խաթունը մաքրում է եկեղեցին, ընդունում ուխտագնացներին եւ զբոսաշրջիկներին:
Կայքը հայտնում է, որ հայկական եկեղեցու խնամքով զբաղվում է մահմեդական կինը, քանի որ Հայոց ցեղասպանության ժամանակ տեղի հայերը բնաջնջվել, բռնագաղթի են ենթարկվել, եւ այժմ այդ շրջանում քրիստոնյա հայեր չեն մնացել: Դերիկի Կարմիր եկեղեցում տարեկան մեկ անգամ ծիսական արարողություն է կատարվում Պոլսո հայոց պատրիարքարանի կողմից:
