WikiLeaks կայքէջի տվյալների պահեստարան հանդիսացած սերվերը համացանցային eBayում աճուրդի է հանվել, եւ գինը նախնական 1 դոլարից հասել է 33 հազարի, հաղորդում է Ռոյթեր գործակալությունը:
Dell ընկերության PowerEdge R410 տիպային սերվերը աճուրդի հանելով վաճառել է շվեդական Bahnhof ցանցային մատակարարը, որն անցյալում WikiLeaks-ին լրատվական «արտահոսքերի» տեղաբաշխման ծառայություններ էր մատուցում:
WikiLeaks-ում բացասաբար են արձագանքել աճուրդի հետ կապված լուրերին եւ Bahnhof-ին մեղադրել են ինքնագովազդման մեջ:
Վերջինիս ներկայացուցիչները չեն հրապարակել գնորդի անունը եւ քաղաքացիությունը, նշելով միայն, որ նա շվեդահպատակ չէ: Bahnhof-ում նաեւ ընդգծել են, որ թեեւ տեղեկությունները ջնջվել են սերվերի վրայից, վերջինս «համաշխարհային պատմության մի մասն է» եւ ունի «հսկայական խորհրդանշական կարեւորություն»:
Վաճառքից ստացված ամբողջ գումարը հավասարապես կիսվելու է «Թղթակիցներ առանց սահմանի» եւ «Հուլիսի 5-ի հիմնադրամ» կազմակերպությունների միջեւ, որոնք հանդես են գալիս խոսքի ազատության սահմանափակումների դեմ եւ ամբողջ աշխարհում աջակցում են լրագրողներին:
WikiLeaks կայքէջը մասնագիտացած է գաղտնի փաստաթղթերի հրապարակման մեջ: Կայքէջը 2010 թ. հանրահայտ դարձավ Իրաքի պատերազմի վերաբերյալ հազարավոր գաղտնի փաստաթղթերի, ինչպես նաեւ ողջ աշխարհում ԱՄՆ-ի դիվանագիտական ներկայացուցչությունների աշխատակիցների գրագրության հրապարակումից հետո:
Կայքէջի հիմնադիր Ջուլիան Ասանժը ներկայումս Լոնդոնում թաքնվում է Էկվադորի դեսպանատան տարածքում:
