Այն, ինչ երեկ կատարվեց պաշտպանության նախարարության քննչական ծառայությունում, նման էր վատ բեմադրված շոուի: ՊՆ քննչական ծառայության պետ Արմեն Հարությունյանը նախ ափսոսանք հայտնեց, որ կատարվել է սպանություն, հետո արդեն անցավ Սյունիքի նախկին մարզպետ Սուրիկ Խաչատրյանի եւ նրա ընտանիքի անդամների ակտիվ պաշտպանությանը: Արմեն Հարությունյանը, ի տարբերություն Ռուբեն Սահակյանի, բուռն ելույթներ չէր ունենում, սակայն բովանդակային առումով ոչնչով չէր զիջում փաստաբանին: Պակասում էր միայն, որ Արմեն Հարությունյանն էլ ասեր` «Թոռնիկիս արեւ, հավատացե՚ք, Խաչատրյանները մեղավոր չեն»:
Լրագրողների հետ հանդիպմանը քննչական ծառայության պետը ներկայացրեց, թե քանի զենք է եղել եւ ինչպես է օգտագործվելՙ հավելելով, որ Սուրիկ Խաչատրյանին պատկանող ինքնաշեն հրացանը օրինական է: Թե ինչպես կարող է ինքնաշեն հրացանը լինել օրինական, դժվար է պատկերացնել, մանավանդ որ ինքնաշեն հրացանների առնչությամբ Քրեական օրենսգրքով հոդված է սահմանված: Սակայն Հարությունյանը պնդեց, որ օրինական է, քանի որ նախկին ոստիկանապետ Ալիկ Սարգսյանի հրամանը կա: Ենթադրելի է, որ հետին թվով մի հրամանագիր են ստորագրել, որ նախկին ոստիկանապետը իբր ինքնաշեն հրացան է նվիրել: Զարմանալի է, ինչո՞ւ է անհասկանալի արժանիքների համար նախագահի կողմից «Մարտական խաչի» արժանացած Խաչատրյանին ոստիկանապետը ինքնաշեն հրացան նվիրում: «Ոստիկանապետի հրաման կա զենք կրելու թույլտվության մասին: Միայն ինքնաշեն լինելու հանգամանքը չի կարող քրեական պատասխանատվության ենթարկել», ասաց Հարությունյանը: Նա հավաստիացրեց, որ Բուդաղյանների վրա թիկունքից կրակոց չի եղել: Քննչականից ուսումնասիրել են Սուրիկ Խաչատրյանի բնակարանն ու հավաստիացնում են, որ բակի այդ հատվածի վրա Խաչատրյանները պատշգամբ չունեն: Մինչդեռ տնից կրակելու պարագայում պարտադիր չէ պատշգամբ ունենալ. պատուհանից էլ կարելի է կրակել: «Սուրիկ Խաչատրյանը քնած է եղել, իսկ Լորետա Բարսեղյանը չի բղավելՙ Սուրիկ էս ի՞նչ ես անում», ասաց քննչական ծառայության պետ:
Լրագրողների զարմանքը. «Հնարավո՞ր է, որ տան մոտ վիճաբանություն լինի, հնչի 13 կրակոց, եւ մարդը քնից չարթնանա»:
«Կարող է շատ խորն է քնել, ի՞նչ իմանանք»:
Քննչականում պատկերացում չունեն, թե ինչպես է առգրավված տեսագրությունը հայտնվել Սյունիքի մարզպետարանի աշխատակիցների մոտ, ովքեր այն տարածել էին համացանցում եւ կատարվածի առնչությամբ բեսթսելլեր հորինել: «Այդ առնչությամբ նախաքննությունը ընթանում է», ասաց Հարությունյանը
Քննչականից չեն պարզել, թե դեպքից հետո ինչու է Գորիսի ոստիկանությունը ուշ եկել դեպքի վայր, քննչականից նաեւ խուսափում են պատասխանել հարցին, թե ինչու է Սուրիկ Խաչատրյանին պատկանող զենքը հայտնվել նրա թիկնապահի ու որդու մոտ: Այս առնչությամբ նրանք օրենքի խախտում չեն տեսնում, մինչդեռ Քրեական օրենսգրքի «Հրազենը կամ ռազմամթերքն անփութօրեն պահպանելը» 239 հոդվածում կարդում ենք, որ «Հրազենը կամ ռազմամթերը անփութորեն պահպանելը, որը պայմաններ է ստեղծել այդ հրազենը կամ ռազմամթերքը ուրիշի կողմից օգտագործելու համար, ինչպես նաեւ զենքը կամ ռազմամթերքն այլ անձին հանձնելը, եթե դա առաջացրել է ծանր հետեւանքներ, պատժվում է տուգանքով, կալանքով կամ ազատազրկմամբ»: Հաշվի առնելով, որ Սուրիկ Խաչատրյանին պատկանող զենքից մարդ է մահացել, ապա սույն հոդվածով Սյունիքի նախկին մարզպետը պետք է ազատազրկվեր:
Քննչական ծառայության պետն անշուշտ գիտի այս հոդվածի եւ նրա դրույթի մասին, սակայն չի բարձրաձայնում, երեւի նպատակահարմար չէ ու, մեղմ ասած, ցրում է հարցը: Ընդհանուր առմամբ, այն հարցերին, որոնք դուր չէին գալիս Հարությունյանին, նա պատասխանում էր կիսատ-պռատ, լղոզված, կմկմալով: «Ազգ»-ի հարցինՙ Տիգրան Խաչատրյանի արյան մեջ թմրանյութ հայտնաբերվե՞լ է, դա գործում առկա՞ է, Հարությունյանը օրենքներ կարդաց, շուռումուռ տվեց պատասխանը ու վերջում ասաց, որ Արտակ Բուդաղյանի արյան մեջ էլ ալկոլոհոլ են հայտնաբերվել: Մեր կրկնահարցինՙ «Եղե՞լ է Տիգրան Խաչատրյանի արյան մեջ թմրանյութ», Հարությունյանը ասաց. «Այ՚ո, եղել է»:
Ինչ վերաբերում է Արտակ Բուդաղյանի արյան մեջ ալկոհոլի հայտնաբերմանը, Հայկ Ալումյանի տեղեկացմամբՙ զինդատախազությունը տարածել է հաղորդագրություն, որ Բուդաղյանի արյան մեջ եղել է 4 պրոմիլե, մինչդեռ եղել է 1 պրոմիլե: Երեկ Հարությունյանը հաստատեց, որ Հարությունյանի արյան մեջ եղել է 1 պրոմիլե: Ի դեպ, 1 պրոմիլեն չի կարող լուրջ ազդեցություն թողնել:
Քննչականը չի պարզելՙ ի՞նչ պայմաններում է կրտսեր Խաչատրյանը թմրանյութ հայթայթել եւ օգտագործել:
Հարությունյանը հավաստիացնում է, որ կատարվածը ինքնապաշտպանություն է եղել: Լրագրողների դիտարկմանըՙ հնարավո՞ր է, որ 11 փամփուշտ կրակած անձը ինքնապաշտպանվե՞ր, երբ հակառակ կողմից հնչել է 2 կրակոց, Հարությունյանը խուսափեց պատասխանից, միայն հավելեց, որ իրենք իրավական գնահատականներ կատարվածին չեն տալիս:
Նրա խոսքերովՙ Զարզանդ Նիկողոսյանը եւ Տիգրան Խաչատրյանը անմեղ էին, դա է պատճառը, որ նրանք ազատ են արձակվել: Ստացվում է, որ նրանք անօրինական են երկու ամիս կալանքի տակ պահվել, եթե անմեղ են. Հարությունյանը կրկին շփոթվեց. այդ առնչությամբ քննություն է տարվում:
Բազմաթիվ հրամանատարներից, զինվորականներից, Հայաստանի եւ ԼՂՀ պաշտպանության նախարարներից բազմիցս ենք լսել գնահատանքի խոսքեր ինչպես Արտակ Բուդաղյանի մարդկային որակների, այնպես էլ հրամանատարական աշխատանքի վերաբերյալ: ԼՂՀ ՊԲ հրամանատար Մովսես Հակոբյանը երկու անգամ հրապարակավ հայտարարել է, որ Արտակ Բուդաղյանը իր հպարտություն հրամանատարներից է, նրա հրամանատարական որակները բարձր է գնահատել նաեւ ՀՀ պաշտպանության նախարար Սեյրան Օհանյանը: Մովսես Հակոբյանի ներկայացմամբՙ այն զորամասերը, որտեղ ծառայել է Բուդաղյանը, միշտ համարվել են լավագույնը: Գործընկեր հրամանատարների խոսքերովՙ Բուդաղյանը հաճախ իր գրպանից էր գումար տրամադրում զորամասի այս կամ այն հարցի լուծմանը:
Տարակուսելի է, որ բանակի լավագույն հրամանատարի կողքին այսօր կանգնած չէ պաշտպանության նախարարությունը, ոչ թե անիրավ կերպով նրան պաշտպանելու, այլ իրավազրկումից զերծ պահելու համար: Ի վերջո, բացի քննչական ծառայությունից ու Խաչատրյանների ընտանիքից եւ մտերիմներից, քչերն են հավատում, որ մեղավոր են Բուդաղյանները: Դա են վկայում լրատվամիջոցներով տպագրվող հոդվածները, տեսակետներն ու զանգերը, որ ստանում ենք քաղաքացիներից:
