Հայաստանի և Ադրբեջանի փոխվարչապետերի՝ երեկ կայացած հանդիպումն ավելի շատ կազմակերպակչան բնույթի հանդիպում է եղել, որտեղ ձեռք են բերվել որոշակի պայմանավորվածություններ, օրակարգային, աշխատանքային գրաֆիկներ, ժամկետներ և այլն։ Ամենայն հավանականությամբ, երեկվա հանդիպման մեխը սա է եղել, քան առարկայական հարցերի քննարկումը, Azg.am-ի թղթակցի հետ զրույցում ասաց ռազմական փորձագետ Հայկ Նահապետյանը։
«Սահմանազատման և սահմանագծման աշխատանքներով զբաղվող հանձնաժողովների վերաբերյալ որոշումը կայացվել է դեռ 2021 թվականի հունվարի 11-ին։ Սա միակ փաստաթուղթն է, որտեղ վերոնշյալ հանձաժողովների ստեղծման հետ կապված՝ ՌԴ-ն կողմ է։ Նա ձայնի իրավունք ունի և կարող է ազդել որոշումների կայացման վրա։
Այս իրողությունը հաշվի առնելով՝ ամեն ինչ արվեց, որպեսզի սահմանազատման-սահմանագծման և կոմունիկացիաների ապաշրջափակման աշխատանքները տորպեդահարվեն։ Եվ երկար ընդմիջումից հետո փոխվարչապետերի երեկվա հանդիպումն այդ հանձնաժողովների աշխատանքների մասով առաջին հանդիպումն էր։ Տեսնենք՝ մոտ ապագայում այս ամենի շուրջ ինչ զարգացումներ կլինեն», -նշեց ռազմական փորձագետը։
Անդրադառնալով ԱԺ նախագահ Ալեն Սիմոնյանի՝ օրերս արած այն հայտարարությանը, որ չի բացառվում՝ խաղաղության պայմանագիրը ստորագրվի առաջիկա 15 օրվա ընթացքում, Հայկ Նահապետյանն ասաց՝ նման հայտարարություն անելիս խորհրդարանի խոսնակն իրեն մի պահ վարչապետի պարտականությունները կատարող անձ է պատկերացրել։
«Օրենսդիր մարմնի ղեկավարը չի կարող իրազեկ լինել այսպես կոչված խաղաղության պայմանգրի նախապատրաստման գործընթացից։ Սա գործադիրի գործառույթն է, իսկ ԱԺ նախագահը լավագույն դեպքում կարող է գործադիրի ղեկավարների հայտարարությունների վերաբերյալ հրապարակային կարծիք հայտնել։
Իսկ Ալեն Սիմոնյանը պայմանագրի կնքման թեմայի շուրջ խոսում է այնպես, կարծես ինքն է վարչապետը։ Իհարկե, ներքուստ նա նման ցանկություն ունի և լրագրողների հարցերին ի պատասխան՝ չի դիմանում գայթակղությանը կամ բացառապես տգետ է, որը պակաս հավանական չէ»,- ասաց մեր զրուցակիցը։
Ըստ Հայկ Նահապետյանի՝ որքան էլ Ալեն Սիմոնյանն իրեն մտովի պատկերացնում է Նիկոլ Փաշինյանի իրավահաջորդ, ինքը կարծում է, որ Փաշինյանի իրավահաջորդի թեկնածուն արդեն իսկ կա։
«Եվ այս հարցը Հայաստանում չի որոշվել, այլ Ադրբեջանում։ Կարծում եմ՝ Նիկոլ Փաշինյանի իրավահաջորդն Ադրբեջանի փոխվարչապետ Շահին Մուստաֆաևն է, որն, ի դեպ, լավ տիրապետում է հայերենին։ Երբ Հայաստանն ամբողջովին դառնա այսպես կոչված «Արևմտյան Ադրբեջան», Ալիևն այս մարզի մարզպետ երևի թե կնշանակի հենց Շահին Մուստաֆաևին՝ հաշվի առնելով, որ նա հայերի մեջ է ապրել, ծնունդով Տավուշից է և այլն։
Այնպես որ, Ալեն Սիմոնյանը թող մտածի, որ բավականին լուրջ մրցակից ունի։ Իդեպ, ես չեմ բացառում, որ Ալեն Սիմոնյանի տեղը կլինի այնտեղ, որտեղ ժամանակին նեղության մեջ գտնվում էր Նիկոլ Փաշինյանը»,-ամփոփեց Հայկ Նահապետյանը։
Հիշեցնենք, որ երեկ՝ նոյեմբերի 30-ին, Հայաստանի և Ադրբեջանի սահմանին տեղի է ունեցել Հայաստանի Հանրապետության և Ադրբեջանի Հանրապետության միջև պետական սահմանի սահմանազատման ու սահմանային անվտանգության հարցերով հանձնաժողովի և Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի հինգերորդ հանդիպումը՝ ՀՀ փոխվարչապետ Մհեր Գրիգորյանի և Ադրբեջանի փոխվարչապետ Շահին Մուստաֆաևի նախագահությամբ:
Կողմերը շարունակել են սահմանազատման հարցերի քննարկումը, անդրադարձել են կազմակերպչական և ընթացակարգային մի շարք հարցերի:
