Լեւոն Արոնյանը հաջող հանդես չեկավ ԱՄՆ-ի Սենթ Լուիս քաղաքում ավարտված շախմատի մրցաշարում: Հայ գրոսմայստերը 3 շախմատիստների հետ մրցավեճում 6 հնարավորից վաստակած 2,5 միավորով գրավեց 3-րդ տեղըՙ արժանանալով 30 հազար դոլար պարգեւավճարի:
4-րդ տուրում Արոնյանը վերջապես ճաշակեց հաղթանակի քաղցրությունըՙ պարտության մատնելով Հիկարու Նակամուրային: Հաջորդ տուրում Լեւոնը հաշտություն կնքեց Գատա Կամսկու հետ: Մրցաշարի ավարտական տուրում վճռորոշ նշանակություն ուներ Մագնուս Կառլսենի եւ Լեւոն Արոնյանի մրցավեճը: Կառլսենը մեկ միավորով գերազանցում էր Արոնյանինՙ միանձնյա գլխավորելով աղյուսակը: Այդ պարտիայում հաղթեց նորվեգացի գրոսմայստերը, որն էլ 4,5 միավորով դարձավ մրցաշարի հաղթող: Կառլսենը պարգեւատրվեց 70 հազար դոլարով: 2-րդ տեղը 3,5 միավորով գրավեց Հիկարու Նակամուրանՙ որպես պարգեւ ստանալով 50 հազար դոլար: Աղյուսակը 1,5 միավորով եզրափակած Գատա Կամսկին 20 հազար դոլար վաստակեց:
