Ավագանու նիստերի բոլոր հարցերը պետք է դարձնել զեկուցվող. սա օբյեկտիվորեն ճիշտ պահանջ է. քաղաքագետ

Քաղաքագետ Դավիթ Ստեփանյանը կիսում է Երևանի ավագանու «Մայր Հայաստան» և և «Ազգային առաջընթաց» խմբակցությունների տեսակետը, որ ավագանու օրակարգի բոլոր հարցերը պետք է դարձնել զեկուցվող։

Նրա խոսքով՝ եթե կառավարության նիստերի օրակարգում չզեկուցվող հարցերի առկայությունը կարելի է ինչ-որ կերպ արդարացնել, ապա Երևանի ավագանու պարագայում դա անընդունելի է։

«Կառավարության օրակարգում կարող են լինել հարցեր, որոնք վերաբերում են ազգային անվտանգությանը, ԱԱԾ-ին, և այո՛, իրականում հիմքեր կան, որ դրանք չզեկուցվեն։ Ավագանու պարագայում ես նման բնագավառներ չեմ տեսնում և կարծում եմ, որ Երևանի քաղաքապետարանում ամբողջ գործընթացը պետք է լինի պարզ, և հասարակությունն ու ավագանու բոլոր անդամները պետք է ամեն ինչ տեսնեն։

Այս առումով «Մայր Հայաստան» և և «Ազգային առաջընթաց» խմբակցությունների մոտեցումն այս հարցում օբյեկտիվորեն ճիշտ է»-, Azg.am-ի թղթակցի հետ զրույցում ասաց քաղաքագետը։

Դավիթ Ստեփանյանը չբացառեց, որ չզեկուցվող հարցերից որոշներն առնչություն ունենան կոռուպցիոն ռիսկերի  հետ, և Երևանի ավագանու «Քաղաքացիական պայմանգիր» խմբակցությունը փորձի չզեկուցվող հարցերի համատեքստում առաջ տանել սեփական օրակարգը։

«Այն, որ նրանք ունեն բոլոր հնարավորությունները, որպեսզի ձայների մեծամասնությամբ դա առաջ տանեն, ակնհայտ է։ Բայց ես հույս ունեմ, որ Երևանի ավագանու «Հանրապետություն» խմբակցությունը այս հարցում ողջամիտ դիրք կզբաղեցնի, այլ ոչ թե կդիրքավորվի՝ քաղաքական կոնյուկտուրայից ելնելով։ Այս դեպքում, կարծում եմ, «Քաղաքացիական պայմանագիր» խմբակցությունը չի կարող այս հարցն առաջ տանել»,- ասաց քաղաքագետը։

Վերջում Դավիթ Ստեփանյանը կրկին ընդգծեց՝ որպես հասարակության անդամ և երևանցի՝ ինքը լիովին կիսում է ավագանու նիստերը թափանցիկ և չզեկուցվող հարցերից զերծ անցկացնելը։

Հիշեցնենք, որ այսօր կայացած ավագանու նիստի ընթացքում «Մայր Հայաստան» խմբակցության ղեկավար Մանուկ Սուքիասյանը և «Ազգային առաջընթաց» խմբակցության ղեկավար Արամ Թորոսյանը պահանջել էին օրակարգի բոլոր հարցերը դարձնել զեկուցվող, հակառակ պարագայում իրենք չեն մասնակցի օրակարգային հարցերի քննարկմանը։

«Կառավարության որդեգրած չզեկուցվող հարցերի արատավոր պրակտիկան փորձ է արվում տեղափոխել Երևանի քաղաքապետարան։ Առհասարակ, բոլոր հարցերը պետք է զեկուցվեն՝ անկախ նրանից, թե հանձնաժողովներում ինչ եզրակացության են եկել», – հայտարարել էր «Մայր Հայաստան» խմբակցության ղեկավար Մանուկ Սուքիասյանը։