Բայդենը «կոշտ բանակցություններ» կվարի Սի Ցզինպինի հետ. գրում է Politico-ն։
ԱՄՆ նախագահը նախատեսում է «կոշտ բանակցություններ» վարել Չինաստանի ղեկավարի հետ՝ կապված պաղեստինա-իսրայելական հակամարտության սրման և Ուկրաինայում Ռուսաստանի ռազմական գործողությունների հետ. պնդում է Politico թերթը։ Քննարկվելիք այլ թեմաներ են՝ կլիմայական համագործակցությունը և «ԱՄՆ-ում օփիոիդների գերդոզավորման համաճարակի տարածման մեջ Չինաստանի դերը»:
Երկու ղեկավարների հանդիպումը տեղի կունենա չորեքշաբթի՝ նոյեմբերի 15-ին, Կալիֆորնիայի Սան Ֆրանցիսկո քաղաքում Ասիա-խաղաղօվկիանոսյան տնտեսական համագործակցության (APEC) գագաթնաժողովի շրջանակում: Վերջին անգամ ԱՄՆ-ի և Չինաստանի ղեկավարները հանդիպել են 2022 թվականի նոյեմբերին, G-20-ի գագաթնաժողովում, Բալիում: Վերջին անգամ Սի Ծինփինն ԱՄՆ է այցելել 2017թ.
Պարբերականի տվյալներով՝ Բայդենը Չինաստանի առաջնորդին կոչ կանի օգտագործել իր ազդեցությունն Իրանի վրա՝ թույլ չտալու Թեհրանին և նրա կողմնակիցներին միջամտել Իսրայելի պատերազմին՝ պաղեստինյան ՀԱՄԱՍ շարժման դեմ, ինչը կարող է ավելի լայն տարածաշրջանային հակամարտություն հրահրել։
Ինչպես նշում է հրատարակությունը, Վաշինգտոնը մտավախություն ունի, որ իրանամետ Հեզբոլլահ շարժումը, որը հիմնվել է Լիբանանում, կարող է արձագանքել ՀԱՄԱՍ-ի կոչերին և երկրորդ ճակատ բացել Իսրայելի դեմ։ Միևնույն ժամանակ, Չինաստանը և Իրանը ռազմավարական գործընկերություն ունեն, որը սնուցվում է Միացյալ Նահանգների նկատմամբ ընդհանուր հակակրանքով. հավելել է թերթը:
Իրանի հետ Չինաստանի կապերը պետք է լինեն Բայդենի և Սի Ցզինպինի «կոշտ խոսակցությունների» մի մասը, որոնք կշոշափեն ԱՄՆ-Չինաստան հարաբերությունների բոլոր առանցքային հարցերը. գրում է Politico-ն՝ վկայակոչելով բարձրաստիճան պաշտոնյային:
«Երկու առաջնորդները նաև կարծիքներ կփոխանակեն բազմամյա թեժ հարցերի, այդ թվում՝ մարդու իրավունքների, ինչպես նաև Թայվանի նեղուցում և Հարավչինական ծովում աճող լարվածության շուրջ»,- ասվում է գրառման մեջ։
