Մեկնարկում է «Կոմիտաս վարդապետ» համահայկական փառատոնը, որի շրջանակներում տեղի կունենան համերգներ, գիտաժողովներ եւ այլ միջոցառումներ: «Արմենպրես»-ի հաղորդմամբ, այս մասին լրագրողների հետ հանդիպման ժամանակ խոսեց ՀՀ սփյուռքի նախարար Հրանուշ Հակոբյանը: «Մենք փորձում ենք աշխարհին էլ ավելի ճանաչելի դարձնել Կոմիտասին: Փորձելու ենք այս փառատոնը ավանդական դարձնել: Փորձում ենք հավատարիմ մնալ Կոմիտասի ձեռագրին եւ անաղարտորեն ներկայացնել հայկական երաժշտությունը»,- ասաց նախարարը: Նախարարն ընդգծեց, որ փառատոնը կտարածվի նաեւ մարզերում, եւ համերգներ կլինեն Էջմիածնում, Գյումրիում, Վանաձորում:
Փառատոնի շրջանակում կկայանա նաեւ Կոմիտասին նվիրված ֆիլմի շնորհանդես: «Կոմիտաս վարդապետ» փառատոնի ղեկավար Սամվել Հարոյանը ներկայացրեց միջոցառումների ծրագիրը եւ հայտնեց, որ ստեղծվել են գեղարվեստական եւ համակարգող խորհուրդներ, որոնք կկարգավորեն փառատոնի ընթացքը: «Կփորձենք լավագույնս ներկայացնել Կոմիտասին` իր ամբողջ գործունեությամբ: Փառատոնը ամենամյա դարձնելու համար մեզ լուրջ աշխատանք է սպասում»,- ասաց Հարոյանը:
Փառատոնին մասնակցության հայտ են ներկայացրել սփյուռքահայ եւ այլազգի կատարողներ աշխարհի 11 երկրից: Սեպտեմբերի 26-ից հոկտեմբերի 3-ը ՀՀ սփյուռքի նախարարությունը կազմակերպում է «Կոմիտաս վարդապետ» համահայկական փառատոն, որի շրջանակներում Երեւանում, Գյումրիում, Վանաձորում, Էջմիածնում տեղի կունենան համերգներ, Կոմիտասի կյանքին ու ստեղծագործությանը նվիրված գիտաժողով եւ այլ միջոցառումներ, կհրատարակվեն գրքեր, կթողարկվեն խտասալիկներ:
«Կոմիտաս վարդապետ» համահայկական փառատոնի նպատակն է նորովի արժեւորել բազմաշնորհ հանճարի` ազգային կոմպոզիտորական դպրոցի հիմնադիրի, երաժշտագետի, բանահավաքի, երգչի, խմբավարի, մանկավարժի ու բանաստեղծի անցած ուղին, նոր լույսի ներքո բացահայտել ցեղասպանություն վերապրած արվեստագետի կերպարը: «Արմենպրես»
