ԳԱՐԻԿ ԱՎԵՏԻՍՅԱՆ
Էդիթ Պրինտը հրատարակել է Պարույր Սեւակին նվիրված հանրագիտակը, ուր Յուրի Պետրոսյանը բանաստեղծին ներկայացնում է առօրյա կյանքում, մտերիմների շրջապատում, ուրախության ու տխրության պահերին, քնքշանք ու բարկություն արտահայտելիս: Հանրագիտակում Սեւակի պոեզիայի սիրահարներս նրան ճանաչում ենք որպես շինարարի, այգեպանի, քնքուշ հոր, սիրող տղամարդու եւ իսկապես մեծ մարդասերի, ամենահայի:
Հրատարակել է նաեւ Հայաստանի վաստակավոր նկարիչ Շմավոն Շմավոնյանի «Արարատ» գիրք-ալբոմը, որն ընդգրկում է նկարչիՙ 1993-2013 թթ.-ին արված կտավները, որոնք զուգորդված են հայ եւ օտարազգի հեղինակներիՙ Արարատ լեռան մասին քառատողերով, նկարչի կենսագրական տվյալներով: Նրա կտավներում բնութեան ձայնն այնքան արտահայտիչ է, որ «հայեացք մը նետելով անոնց վրայ, կարծես թէ կառնչուիս նկարիչի ներաշխարհին հետ, ուր գիւղական անաղարտութիւնը, մաքրամաքուր զգացումներու, ապրումներու հրաշալի պատկերներ դրոշմուած են… »:
«Արարատ» գիրքը հայերեն, ռուսերեն եւ անգլերեն լեզուներով է:
Այս ոչ մեծածավալ գրքում, որը կարելի է նկարչի ստեղծագործությունների ալբոմ անվանել, հայրենական բնությունը պատկերող կտավներին համահունչ հայ եւ օտարազգի բանաստեղծների քառատողեր են գրված:
