Իրանում սպանվել է կիբեռանվտանգության գերատեսչության ղեկավար Մոջթաբա Ահմադին: Նրա դիակը գտել են Թեհրանի արվարձան Քերեջից ոչ հեռու, անտառում: Այդ մասին հաղորդում է բրիտանական «Դեյլի թելեգրաֆ» թերթը, վկայակոչելով Իսլամական հեղափոխության պահապանների կորպուսի հետ կապված Alborz News կայքէջը:
Մոջթաբա Ահմադիին վերջին անգամ ողջ տեսել էին սեպտեմբերի 28-ին, տնից դուրս գալու պահին: Մի ականատես Alborz News-ին հայտնել է, որ ավելի ուշ նրան գտել են մեռած, հրազենային վերքերով: Ականատեսի խոսքերով, վերքերի բնույթը ցույց է տալիս, որ մոտ տարածությունից նրա վրա կրակել են ատրճանակից:
Ոստիկանության ներկայացուցիչը հայտարարել է, որ սպանության երկու մասնակիցները հեռացել են մոտոցիկլետով: Իսլամական հեղափոխության պահապանների կորպուսը սկսել է քննություն: Առայժմ չի հաղորդվում, թե ով կարող է պատվիրած լինել այդ սպանությունը:
2007 թվականից մինչեւ օրս Իրանում սպանվել է ատոմային էներգետիկայի բնագավառի 5 մասնագետ, ինչպես նաեւ բալիստիկ հրթիռների մշակման ծրագրի ղեկավարը: Թեհրանն այդ հանցագործությունների համար մեղադրել է Իսրայելին, որը բացեիբաց հանդես է գալիս իրանցիների միջուկային ծրագրի դեմՙ վախենալով Իրանում միջուկային զենքի ստեղծումից: Արեւմուտքի երկրները Իրանին մեղադրել են նաեւ կիբեռգրոհների կազմակերպման մեջ, սակայն վերլուծաբանները կարծում են, որ դրանք այնքան վտանգավոր չեն:
