Թուրքիայի վարչապետ Ռեջեփ Թայիփ Էրդողանը հրապարակել է քաղաքական բարեփոխումների ծրագիր: Նա մասնավորապես հայտարարել է, որ շուտով կվերացվի պետական հիմնարկներում հիջաբ կրելու արգելքը:
Ռոյթեր գործակալությունը նշում է, որ հիջաբի արգելքը կտարածվի միայն իրավապահ մարմինների եւ զինված ուժերի կին ծառայողների վրա:
Բարեփոխումների մեկ այլ փաթեթի համաձայն պետք է բարելավվի ազգային փոքրամասնությունների վիճակը: Քրդերին կթույլատրեն վերականգնել բնակավայրերի պատմական քրդական անվանումները: Կվերացվի քրդական այբուբենի օգտագործման արգելքը: Բացի դրանից, մասնավոր դպրոցներում հնարավոր կլինի դասավանդել համայնքի լեզվով, նշում է Ասոշիեյթեդ պրես գործակալությունը:
Ասորիների վիճակը եւս պետք է բարելավվի: Էրդողանն ասել է, որ ասորական ուղղափառ եկեղեցու քրիստոնյաներին կվերադարձվեն պետության բռնագրաված վանքապատկան կալվածքները:
Վարչապետն առաջարկել է խորհրդարանական ընտրություններում կուսակցությունների ընտրական արգելապատնեշը 10-ից իջեցնել 5 տոկոսի կամ նույնիսկ վերացնել այն:Լ Ենթադրվում է, որ տվյալ ձեռնարկումը կօգնի քրդամետ քաղաքական կուսակցություններին, որոնք լայն պաշտպանություն են վայելում առանձին շրջաններում, բայց համազգային մակարդակով չեն կարողանում բավարար քվեներ ստանալ:
Սեպտեմբերին քրդական PKK-ն դադարեցրել էր Թուրքիայից իր մարտիկների դուրսբերումըՙ հայտարարելով, որ իշխանությունները չեն կատարում խոստացված բարեփոխումները: Քրդերը կազմում են Թուրքիայի բնակչության մոտ 18 տոկոսը: Եվս 7-12 տոկոս կազմում են մյուս ազգային փոքրամասնությունները:
