Հոկտեմբերի 20-ին Լեհաստանի Վրոցլավ քաղաքում կտրվի ծանրամարտի աշխարհի 80-րդ առաջնության մեկնարկը: 1891-ից անցկացվող համաշխարհային ծանրամարտի այդ ստուգատեսում Հայաստանը կներկայանա ընդամենը 3 ծանրորդով: Մեդալների համար պայքարում մրցահարթակ դուրս կգան երիտասարդներըՙ Սմբատ Մարգարյանը (56 կգ), Վանիկ Ավետիսյանը (69 կգ) եւ գերծանրքաշային Հայկ Հակոբյանը:
Դժվար է հիշել, թե աշխարհի առաջնություններում երբ է Հայաստանը նման սակավաթիվ մարզիկներով հանդես եկել: Ծանրամարտի Հայաստանի ֆեդերացիայի գլխավոր քարտուղար Փաշիկ Ալավերդյանը գտնում է, որ դրանում տարօրինակ ոչինչ չկա: Սովորաբար ընդունված է, որ օլիմպիադային հաջորդող աշխարհի առաջնությանը մասնակից երկրները մրցահարթակ են դուրս բերում իրենց ոչ լավագույն կազմըՙ հնարավորություն ընձեռելով երիտասարդներին փորձարկելու ուժերը: Սա բացատրվում է նաեւ այն հանգամանքով, որ Վրոցլավում կայանալիք ծանրամարտի աշխարհի առաջնությունը վարկանիշային չէ: 2016-ին Ռիո դե Ժանեյրոյում կայանալիք ամառային օլիմպիադայի ուղեգրերի համար վարկանիշային են լինելու 2014-ի եւ 2015-ի աշխարհի առաջնությունները:
Ինչ վերաբերում է մեր անվանի ծանրորդներին, ապա նրանցից մեկըՙ աշխարհի նախկին չեմպիոն Տիգրան Մարտիրոսյանը շարունակում է մարզվել եւ պատրաստվում է մրցահարթակ դուրս գալ հաջորդ տարվա Եվրոպայի առաջնությունում: Ինչ վերաբերում է կանանց, ապա հիմնական կազմի աղջիկները վնասվածքներ ունեն եւ լիովին պատրաստ չեն աշխարհի առաջնությանը: Ուստի այս անգամ Հայաստանը կանանց ասպարեզ դուրս չի բերի:
Ի դեպ, աշխարհի առաջնության նախնական հայտում ընդգրկված էր նաեւ գերծանրքաշային Ռուբեն Ալեքսանյանը: Ինչպես տեղեկացանք ծանրամարտի տղամարդկանց հավաքականի գլխավոր մարզիչ Պողոս Պողոսյանից , մի քանի օր առաջ մարզումների ժամանակ ծանրորդը ցավեցրել է ձեռքը եւ հին վնասվածքը զգալ է տվել: Մտավախություն կար, որ առաջնության ժամանակ վնասվածքը կարող էր ավելի բարդանալ, քանի որ Ռուբենը պայքարելու էր մեդալների համար: Ուստի մարզիչները նպատակահարմար գտան նրան չընդգրկել Վրոցլավ մեկնող հավաքականի կազմում, այլ հնարավորություն տալ ծանրորդին լիովին ապաքինվելու եւ լիարժեք մասնակցելու 2014-ին կայանալիք Եվրոպայի առաջնությանը:
Աշխարհի առաջնության մասնակից մեր 3 ծանրորդներից 2-ըՙ Սմբատ Մարգարյանն ու Հայկ Հակոբյանը սեպտեմբերին հանդես եկան Տալլինում անցկացված ծանրամարտի Եվրոպայի երիտասարդական առաջնությունում: Սմբատը մինչեւ 20 տարեկանների մրցաշարում երկամարտի 241 կգ (104+137) արդյունքով դարձավ բրոնզե մրցանակակիր, փոքր արծաթե մեդալ նվաճեց հրում վարժությունում: Իսկ Հայկը մինչեւ 23 տարեկանների մրցաշարում երկամարտի 393 կգ (182+211) արդյունքով դարձավ Եվրոպայի երիտասարդների փոխչեմպիոն, արծաթե մեդալ նվաճեց նաեւ պոկում վարժությունում: Իսկ ընդհանրապես մեր 3 ծանրորդներն էլ պատանեկան եւ երիտասարդական տարբեր մրցաշարերում բազմիցս մրցանակակիրներ են դարձել: Սմբատն իր ուժերն է չափել նաեւ մեծահասակների առաջնություններում: Մասնավորապես 2010-ին նա Մինսկում կայացած Եվրոպայի առաջնությունում մինչեւ 56 կգ քաշային կարգում արծաթե մեդալ է նվաճել:
Վրոցլավում Սմբատը մրցահարթակ դուրս կգա հոկտեմբերի 21-ին: 2 օր անց մրցավեճի կբռնվի Վանիկ Ավետիսյանը: Իսկ Հայկ Հակոբյանը մեդալների համար պայքարի կելնի մրցումների վերջին օրըՙ հոկտեմբերի 27-ին:
