Ռուսաստանի հայերի միության փոխնախագահ, Կովկասի ժողովուրդների ռուսաստանյան կոնգրեսի համանախագահ Լեւոն Մուկանյանը «Ազգին» հասցեագրած նամակում նշում է, որ Մոսկվայի կենտրոնական փողոցներից մեկումՙ նախկին Բոլշայա Վագանկովսկայա փողոցում փակցված է ցուցանակ, որով բողոք է արտահայտվում 1922 թ. կատարված անվանափոխության կապակցությամբ: 1683-1922 թթ. Բոլշայա Վագանկովսկայա կոչված փողոցը 1922-ին ապօրինաբար Բոլշայա Դեկաբրսկայա են վերանվանել ռուս ժողովրդի ցեղասպանություն իրականացրած աստվածամերժ բոլշեւիկներըՙ ի պատիվ Մոսկվայում 1905-ի դեկտեմբերին ցարի դեմ ահաբեկիչների բարձրացրած խռովության: Փողոցի թիվ 3-ում գործող ձեռնարկության աշխատողները մերժում են այս անվանափոխությունը եւ 2009-ից վերականգել են Բոլշայա Վագանկովսկայա անունըՙ հույս հայտնելով, որ դա շուտով պաշտոնապես կհաստատվի:
Նամակագիրը նշում է, որ ՌԴ ներկայիս ժողովրդավարական իշխանությունը պարտավոր է դատապարտել բոլշեւիկների կատարած հանցագործությունները, մասնավորապեսՙ Ռուսական կայսրության ոչնչացումը, օրինական իշխանության տապալումը, ցարական ընտանիքի բնաջնջումը, ռուս մտավորականության, հոգեւորականության ոչնչացումը, ընտրյալների տարագրումը, հայկական հողերի հանձնումը բոլշեւիկների հանցակից երիտթուրքերին, որոնք բոլշեւիկներին խաբեցին Թուրքիայում կոմունիզմ կառուցելու դատարկ խոստումներով, իսկ իրականում Ռուսական կայսրության հարավում ոչնչացնում էին ռուսամետ քրիստոնյա բնակչությանը, մինչեւ 1923 թ. վախենալով կայսրության վերականգնումից: Եղեռնից հրաշքով փրկվածները կամ թուրքացվում էին, կամ արտաքսվում իրենց պատմական հողերից: Հայերի բնաջնջումը 20-րդ դարի առաջին ցեղասպանությունն էր, որին հաջողվեց Հոլոքոսթը: Հայտնի իրավաբան-միջազգայնագետ Ռաֆայել Լեմկինը, այդ ոճրագործությունը հիմք ընդունելով, ձեւակերպեց եւ իրավաբանորեն նկարագրեց «ցեղասպանություն» տերմինը:
Անհրաժեշտ է դատապարտել բոլշեւիկների հանցավոր քայլերը, որոնք երիտթուրքերին ընդառաջելովՙ հայկական Արցախ-Լեռնային Ղարաբաղը հանձնեցին 20-րդ դարում Պարսկաստանին ի հակակշիռ եւ նրա նահանգներից մեկի անունով արհեստականորեն ստեղծված «Ադրբեջան» պետական կազմավորմանը:
Դարեր շարունակ ռուս եւ հայ ռազմիկների արյան գնով բարբարոսներից փրկված հայկական տարածքների 90 տոկոսը հանուն բոլշեւիկների իշխանության պահպանման հանձնվեց պատերազմում փաստորեն պարտված Թուրքիային, շարունակում է նամակագիրը:
Կործանված Ռուսական կայսրության թե՛ կենտրոնական մասում, թե՛ հարավային սահմաններում հանցագործ բոլշեւիկների պատճառով զոհվեցին միլիոնավոր մարդիկ: Ներկայիս ժողովրդավարական իշխանությունները պարտավոր են դատապարտել բոլշեւիկների հանցագործ որոշումներն ու պայմանագրերը, որոնք խեղեցին ամբողջ ժողովուրդների ճակատագրեր, ընդգծում է Մուկանյանը:
Դատապարտելն անհրաժեշտ է այսօր, որպեսզի ապագայում բացառվի նման պատմական իրադարձությունների կրկնությունը:
