Արցախի հանդ ու դաշտերում անթաղ մարմիններ կան, անհետ կորածներ։ Ադրբեջանցիների գրաված տարածքներում արդեն 4-5 օր անթաղ մնացած մարմիները հարազտները չեն կարողանում փնտրել ու հանել։ Նույն 44-օրյայի պատմությունն է, նույն 2022 թվականի սեպտեմբերի 13-15-ի պատերազմի պատմությունը, երբ թշնամին կրակում էր ու թույլ չէր տալիս զոհվածների մարմինները հանել ռազմական գործողությունների տարածքներից։
Արցախում ամեն օր նոր գերեզմաններ են փորվում, բայց իրենց հարազատի մարմինը գտած արցախցիները չգիտեն՝ նրան այնտե՞ղ հուղարկավորեն, թե բերեն Հայաստան։ Մյուսներն էլ խելագարված իրենց կորած հարազատներին են փնտրում, որ գոնե մարմինները չմնան անթաղ՝ բաց երկնքի տալ, անգերեզման ու անհայտ։
Օգոստոսի 14-ին ողբերգական ավտովթարից մահացած Հելեն Դադայանը վերջապես կհուղարկավորվի… Հայաստանում։
40 օր Հելենի մարմինը Գորիսի դիահերձարանում է։ Ադրբեջանցիներն այդպես էլ թույլ չտվեցին աղջկա մարմինը տեղափոխել Արցախ ու հուղարկավորել հայրենի հողում։ Մայրը համաձայնել է, որ Հելենը հուղարկավորվի Հայաստանում։
