Իրանական լրատվամիջոցները սեպտեմբերի 19-ին հայտնեցին Ռուսաստանի Դաշնության պաշտպանության նախարար Սերգեյ Շոյգույի Թեհրան այցելության մասին հագեցած տեղեկատվություն:
Երկկողմ հանդիպումների ընթացքում, ինչպես նշված է պաշտոնական հաղորդագրություններում, բարձր է գնահատվել միջազգային ահաբեկչության դեմ պայքարում երկու երկրների համագործակցությունը: Իրանական մամուլը նաեւ փոխանցել է ռուս-իրանական հարաբերությունների ռազմավարական նշանակության մասին Շոյգուի գնահատականները:
Ըստ պաշտոնական հաղորդագրությունների, կողմերը քննարկել են պաշտպանական ու ռազմական ոլորտում համագործակցության մակարդակի բարձրացման նպատակով 2024 թ. փետրվարին նախատեսված համատեղ զորավարժությունների մանրամասները: Պաշտոնապես հայտարարվել է, որ կողմերը խորհրդակցություններ են անցկացրել տարածաշրջանում տեղի ունեցող իրադարձությունների զարգացմանը, ինչպես նաեւ պաշտպանության ոլորտում երկկողմ հարաբերություններին վերաբերող հարցեր: ՌԴ պաշտպանության նախարարության պատվիրակությունը մի շարք բանակցություններ է անցկացրել Իրանի ռազմական ղեկավարության հետ, որի մասին իրանական լրատվամիջոցները հագեցած տեղեկատվություն են հրապարակել: Կողմերը պատրաստակամություն են հայտնել աջակցելու նաեւ Հայաստանի ու Ադրբեջանի միջեւ առկա տարաձայնությունների կարգավորմանը:
Սակայն, Շոյգուի այցը Թեհրան ուներ նաեւ չհրապարակված դրվագներ: Նույն ժամանակահատվածում, երբ Ադրբեջանը ռուսական կողմին իրազեկելուց հետո լայնածավալ հարձակում էր սկսել Արցախի դեմ, ադրբեջանական ագրեսիայի մասին տեղեկացված Ռուսաստանի պաշտպանության նախարար Սերգեյ Շոյգուի գլխավորած պատվիրակությունն այցելում է Իրան:
Չի կարելի բացառել, որ ՌԴ պաշտպանության նախարարին հանձնարարված է եղել Արցախում նախատեսված ռազմական գործողությունների եւ դրանց սահմանափակ բնույթի մասին ուղերձներ փոխանցել իրանական կողմին, ներկայացնել ձեռնարկվող գործողությունների նպատակներն ու ծավալները՝ կանխելու Իրանի հնարավոր ներգրավվածությունը գործողություններին, ինչը պիտի պայմանավորված լիներ Թեհրանի հայտարարած կարմիր գծերով:
Նման իրազեկման անհրաժեշտությունը թերեւս բխում էր նրանից, որ վերջերս Թեհրանն ստացել էր ռազմական գործողությունների չդիմելու Բաքվի հավաստիացումները, որի մասին սեպտեմբերի 11-ին իր շաբաթական մամուլի ասսուլիսի ժամանակ հայտնել էր Իրանի ԱԳՆ խոսնակ Քանանին:
Հավանաբար ուկրաինական պատերազմի հետեւանքների ծանր բեռն իր ուսերի վրա կրող Ռուսաստանին նաեւ անհրաժեշտ էր զգուշացնել Իրանին, որ Մոսկվան չի պատրաստվում Հարավային Կովկասում իր տեղը զիջել այլ խաղացողների եւ շարունակելու է պահպանել վերահսկողությունը տարածաշրջանի վրա:
Անշուշտ, մեր կանխատեսումները բացառապես հիմնված են ենթադրությունների վրա: Սակայն, որքան կարելի էր կանխատեսել ՌԴ պաշտպանության նախարարի Թեհրան այցելության չհրապարակված դրվագները, նույնքան կանխատեսելի էր նաեւ սեպտեմբերի 19-ին Արցախի դեմ սանձազերծված պատերազմը:
ԳՐԻԳՈՐ ԱՌԱՔԵԼՅԱՆ
Իրանագետ
