Գերմանական «Kicker» հանդեսի լրագրող Թոմաս Հենեկեն Sport-express-ի թղթակցի հետ զրույցում իր տպավորություններն է հայտնել Հենրիխ Մխիթարյանի մասին, որը «Շալկե-04-ի» հետ խաղում դարձել էր գոլային 2 փոխանցման հեղինակՙ մեծ ներդրում ունենալով «Բորուսիայի» հերթական հաղթանակում:
– Խաղից հետո Յուրգեն Կլոպը հայտարարել էր, որ 3-րդ գոլը համաշխարհային մակարդակի էր: Անբացատրելի է, թե ինչպես Միկին (Գերմանիայում Մխիթարյանին շատերն են այդպես անվանում) կարողացավ նման ճեղքում կատարել: Դուք համաձա՞յն եք նման գնահատականին:
– Լիովին: Դա պարզապես ֆանտաստիկ էր: Գնդակը ստանալով սեփական տուգանային հրապարակի մատույցներում, Մխիթարյանը 70-80 մետր սրընթաց անցում կատարեց, մրցակցի 3 ֆուտբոլիստների շրջանցեց, ապա հիանալի փոխանցում կատարեց Բլաշչիկովսկուն:
– Նկատենք, որ դա տեղի ունեցավ խաղավերջում: Նշանակում է, որ ֆուտբոլիստը ֆիզիկապես լավ է պատրաստված:
– Դա այդպես է: Նրա հետ իմ առաջին զրույցից տեղեկացա, որ Հենրիխը շատ է վազում, փորձում է դիմացկունությունը բարձրացնել: Նա ֆենոմեն է, ֆուտբոլային ադամանդ:
– «Բորուսիայի» կազմում անցկացրած պաշտոնական 12 խաղերում Մխիթարյանը 5 գոլ է խփել: Ի՞նչ եք մտածում նրա արդյունավետության մասին:
– Կարծում եմ, որ լավ արդյունք է: Ուկրաինայի առաջնությունում նա շատ էր գոլեր խփում ու գոլային փոխանցումներ կատարում: Ուստի Գերմանիայում նրանից սպասելիքները մեծ էին: Սակայն ոչ բոլորն էին վստահ, որ Հենրիխն այդպես արագ կհարմարվի բունդեսլիգային: Կարծում եմ, որ մինչեւ հիմա նա իր աշխատանքը հիանալի է կատարել: Ճիշտ է, եղավ 2-3 խաղ, որոնցում նա այնքան էլ ակտիվ չէր, գուցե ինչ-որ սխալներ էր թույլ տալիս: Սակայն ընդհանուր առմամբ նա «Բորուսիայում» գերազանց խաղ է ցուցադրում:
– Յուրգեն Կլոպը հավանաբար գոհ է նրանից:
– Այո: Ակումբի մյուս ղեկավարները նույնպես գոհ են Հենրիխից: Կլոպը Մխիթարյանին նույնիսկ համարում է «Բորուսիայի» զենքը, քանի որ նա շատ արագաշարժ է, տիրապետում է հիանալի տեխնիկայի, հաջող է եզրափակում գրոհները: Նրան սիրում են նաեւ որպես մարդու: Նա շփվող է, մշտապես լավ տրամադրություն ունի: Կարծում եմ, որ «Բորուսիայի» ղեկավարներից ոչ մեկը չի զղջացել, որ 27 մլն եվրո են վճարել Մխիթարյանի տրանսֆերի դիմաց:
– Շատերի կարծիքով, Մխիթարյանին Դորտմունդ էին հրավիրել Մարիո Գյոտցեին փոխարինելու նպատակով: Նորեկն արդարացրե՞ց սպասելիքները:
– Գտնում եմ, որ այո: Սակայն նա այլ խաղաոճի ֆուտբոլիստ է: Իմ կարծիքովՙ Գյոտցեին եւ Մխիթարյանին համեմատելը ճիշտ չէ: Միկին ավելի վտանգավոր է մրցակցի դարպասի մոտ, ավելի սուր է գործում: Գյոտցեն գուցե իրեն լավ էր զգում մրցակցի շրջապատման մեջ: Կարելի է փաստել, որ «Բորուսիան» այդ դիրքում հիանալի ֆուտբոլիստի գտավ: Գյոտցեի մասին արդեն չեն էլ խոսում: Սկսվել է Մխիթարյանի ժամանակաշրջանը, որը խաղադաշտում ունակ է ամեն ինչի, արագաշարժ է, հիանալի է տիրապետում գնդակին, լավ է հասկանում խաղը:
– Մխիթարյանը 5 լեզուների է տիրապետում: Ինչպիսի՞ն է գերմաներենի նրա իմացությունը:
– Մարզումների ժամանակ թարգմանիչը մշտապես նրա կողքին է, սակայն Հենրիխը շաբաթական 2 անգամ գերմաներենի դասընթացի է մասնակցում: Համոզված եմ, որ նա գերմաներենին էլ կտիրապետի:
– Մխիթարյանից առաջիկայում ի՞նչ եք ակնկալում:
– Հուսով եմ, որ նա կշարունակի գործել նույն կերպ, միաժամանակ կյուրացնի դորտմունդյան խաղաոճը եւ որոշ դրվագներում հանդարտություն կպահպանի: Որոշ խաղերում այնպիսի տպավորություն էր, կարծես Հենրիխը մշտապես ցանկանում էր պահպանել բարձր տեմպը: Բայց երբեմն հարկավոր է ավելի պարզ եւ հուսալի գործել ու այդպես ավելի հեշտ կլինի վերահսկել խաղի ընթացքը:
– Անցած մրցաշրջանում «Բորուսիան» 2-րդն էր բունդեսլիգայում եւ չեմպիոնների լիգայում: Որքանո՞վ է իրատեսական, որ 2 մրցաշարում էլ թիմը եւս մեկ, վճռական քայլ կանի դեպի առաջ:
– Իրատեսական է այն, որ «Բորուսիան» նախորդ մրցաշրջանի պես «Բավարիայից» 20 միավորով հետ չի մնա: Թեեւ իր խաղամակարդակով «Բորուսիան» զգալիորեն մոտեցել է «Բավարիային», սակայն իմ կարծիքով նրանից չեմպիոնի տիտղոսը չի խլի: Չեմպիոնների գավաթը նվաճել ցանկանում են իսպանական եւ անգլիական ակումբները, «Բավարիան» էլ հավակնորդներից մեկն է: Կարծում եմ, որ «Բորուսիան» չեմպիոնների լիգայում առաջ կշարժվի, սակայն հաղթողի գլխավոր հավակնորդների թվում թիմին չէի ընդգրկի:
