Արցախում ստեղծված իրավիճակն ուղիղ հետևանք է Նիկոլ Փաշինյանի՝ 2018 թվականից սկսած ապիկար արտաքին և ներքին քաղաքականության։ Նա 2018-ին ոչ միայն չի կարողացել, այլև չի կամեցել սկսել Հայաստանի դուրսբերումը ՌԴ միահեծան ազդեցության գոտուց, մինչդեռ պետք է իմանար, որ Ռուսաստանի, ՀԱՊԿ-ի մյուս երկրների, ինչպես նաև Իսրայելի կողմից մինչև ատամները զինվող Ալիևն անպայման հարձակվելու է։ Azg.am-ի թղթակցի հետ զրույցում այս մասին ասաց արցախցի քաղաքագետ Ալեքսանդր Քանանյանը։
«Նիկոլ Փաշինյանը ոչինչ չի արել անխուսափելի և մոտալուտ պատերազմինն պատրաստվելու համար, չի իրականացրել ռուսական գործակալական ցանցի ամենավտանգավոր ներկայացուցիչների չեզոքացում ՀՀ ուժային կառույցներում, պատերազմի ժամանակ դրսևորել է կատարյալ կամազրկություն, ստորագրել է նոյեմբերի 9-ի հայաստանակործան դավաճանագիրը։ Դրանից հետո բացարձակապես ոչինչ չի արել բանակը վերակազմավորելու և վերազինելու ուղղությամբ»,- ասաց քաղաքագետը։
Ալեքսանդր Քանանյանի խոսքով՝ Նիկոլ Փաշինյանն այսօր վտանգի առջև է կանգնեցրել նաև Սյունիքը, որի հաղորդակցային գծերը Երևանից կտրելը ադրբեջանական ԶՈՒ-երի համար չափազանց հեշտ գործ է։
«Ով չի հասկացել, այսօր արդեն կարող է հասկանալ, որ Ռուսաստանը հայ ժողովրդի և Հայոց պետականության արմատական թշնամին է։ Եթե մենք ուզում ենք, որ մոտական 2 տասնամյակում Հայաստանը գոյություն ունենա, մինչև երկրում ազգային-պետական իշխանության հաստատումը հանրային ջանքերով քաղաքական իմաստով պետք է ոչնչացվի ռուսական գործակալական ցանցը, հենց այսօրվանից պետք է արգելվեն ռուսական ալիքները, պետք է շրջափակվի ՌԴ դեսպանատունը, խզվեն Ռուսաստանի հետ դիվանագիտական հարաբերությունները, 24 ժամվա ընթացքում արտաքսվեն ռուս բոլոր դիվանագետները»,- ասաց քաղաքագետը՝ հավելելով, որ այդպիսով Հայաստանը ցույց կտա, որ ձերբազատվել է ռուսական ստրկությունից։
Ըստ Քանանյանի՝ միայն այդպես կարելի է դրական զարգացում ակնկալել հնարավոր այլ դաշնակիցների որոնման գործում։
Վերջում արցախցի քաղաքագետը շեշտեց՝ Արցախում գտնվող իր շատ ծանոթներ նախընտրում են զահվել, բայց դուրս չգալ իրենց ծննդավայրից։
«Ստեղծված իրավիճակում ես միայն մի հնարավոր զարգացում չեմ կարող բացառել. այն է՝ Ադրբեջանը կարող է մեկ-երկու ժամով կանգնեցնել ռազմական գործողությունները և առաջարկել կատարել իր պայմանները։ Վախենում եմ, որ ԱՀ ներկայիս ղեկավարությունը ասի՝ ժողովուրդ ջան, չենք ուզում կոտորվել, դրա համար էլ եկեք լուծարվենք՝ ով կկամենա, կստանա Ադրբեջանի քաղաքացիություն, ով ոչ՝ կհեռանա, և դրանով հարցը կփակվի»,- ամփոփեց Ալեքսանդր Քանանյանը։
