Անապայում մեկնարկող բռնցքամարտի Եվրոպայի պատանեկան առաջնության պարգեւները վիճարկող 26 երկրների 185 պատանի բռնցքամարտիկների թվում են նաեւ հայաստանցի 10 մարզիկներ: Մեր պատանի բռնցքամարտիկները ուժերի այս ստուգատեսին նախապատրաստվել են Աբովյանի մարզահամալիրում հավաքականի գլխավոր մարզիչ Արման Հարությունյանի գլխավորությամբ: Ըստ մարզչի, մեր բռնցքամարտիկներն անհրաժեշտ տեխնիկատակտիկական պատրաստվածություն ունեն ու պատրաստ են պայքարելու մրցանակային տեղերի համար:
Հարկ է նշել, որ Եվրոպայի առաջնությանը մասնակցող մեր բռնցքամարտիկներից շատերը մրցակցային զգալի փորձ ունեն: Սեպտեմբերին նրանք մասնակցել են Կիեւում անցկացված բռնցքամարտի աշխարհի պատանեկան առաջնությանը: Ռինգ դուրս եկած 8 բռնցքամարտիկներից 2-ը Կիեւում դարձան մրցանակակիրներ: Մինչեւ 50 կգ քաշային կարգում Հրայր Շահվերդյանը հասավ մինչեւ եզրափակիչ, որտեղ 0-3 հաշվով պարտվեց կուբացի Մայքլ Բարերոյին ու հռչակվեց աշխարհի փոխչեմպիոն: Իսկ գերծանրքաշային Արամ Աբրահամյանը բավարարվեց բրոնզե մեդալովՙ կիսաեզրափակիչում զիջելով Բելառուսի ներկայացուցիչ Մաքսիմ Կոզլովին:
Հուսանք, որ Եվրոպայի առաջնությունում էլ մեր պատանի բռնցքամարտիկներին կհաջողվի մեդալներ նվաճել:
