Օրերս մեկնարկեց «Նավասարդյան խաղերի» աշնանային մրցաշրջանը:
«Նավասարդյան խաղերը» Հայաստանի ազգային հարուստ ավանդույթների եւ մերօրյա մշակույթի միջեւ յուրօրինակ մի կամուրջ են, նախաձեռնություն, որը միտված է բացահայտելու եւ աջակցելու շնորհալի պատանիներին եւ երիտասարդներին, ինչպես նաեւ նպաստելու նոր սերնդի ներգրավվածությանը արվեստի տարբեր ոլորտներում: «Նավասարդյան խաղերի» նպատակն է ազգային մշակութային ավանդույթների պահպանումն ու սերունդներին փոխանցելու շարունակականության ապահովումը:
Առաջին «Նավասարդյան խաղերում» ընդգրկված է 36 անվանակարգ, որոնք ներկայացնում են ավանդական եւ արդի արվեստի, արհեստների գրեթե բոլոր ոլորտները: Խաղերը կիրականացվեն փուլային սկզբունքով, տարվա եղանակներին համահունչ (աշուն, ձմեռ, գարուն, ամառ):
Խաղերը մեկնարկեցին Առնո Բաբաջանյան համերգասրահում` «Փողային գործիքներ» անվանակարգի մրցութային առաջին փուլով: Խաղերի աշնանային մրցաշրջանն իրականացվում է 12 անվանակարգում. «Փողային գործիքներ», «Ժողովրդական նվագարաններ», «Էստրադային երգեցողություն», «Ժողովրդական պար», «Մնջախաղ» «Կերպարվեստ», «Ժողովրդական եւ դեկորատիվ կիրառական արվեստ«, «Ասմունք», «Կրկեսային արվեստ», «Հագուստի դիզայն», «Ակադեմիական երգեցողություն», «Դասական պար»:
Վերոնշյալ անվանակարգերում ստացվել է 310 մասնակցության հայտ Երեւանից, ՀՀ 7 մարզերից եւ ԼՂՀ -ից:
«Նավասարդյան խաղերը» կանցկացվեն մրցութային երկու փուլով, երկու տարիքային խմբում կրտսեր եւ ավագ, իսկ մասնակիցների նվազագույն տարիքը 10 տարեկանն է, առավելագույնը 25:
«Նավասարդյան խաղերի» յուրաքանչյուր անվանակարգի համար ձեւավորվել է մրցութային հանձնաժողով, որոնց կազմում ընդգրկված են հանրապետության լավագույն մասնագետները:
Աշնանային խաղերի մրցանակաբաշխության արարողությունը տեղի կունենա Գյումրիում, Վ. Աճեմյանի անվան պետական դրամատիկական թատրոնում, դեկտեմբերին: Այնուհետեւ, Երեւանում, դեկտեմբերի 28-ին, Ալ. Սպենդիարյանի անվան օպերայի եւ բալետի ազգային ակադեմիական թատրոնում մրցանակակիրների մասնակցությամբ տեղի կունենա «Նավասարդյան խաղերի» թատերահամերգային բեմականացումը, որով եւ կազդարարվեն աշնանային մրցաշրջանի փակումը եւ ձմեռային մրցաշրջանի բացումը:
«Նավասարդյան խաղերը» ներառված են նաեւ «Գյումրին 2013 թ. ԱՊՀ մշակութային մայրաքաղաք» ծրագրի շրջանակներում:
