Եթե խոսքն իսկապես գնում է Աղդամ-Ստեփանակերտ ճանապարհով բացառապես ռուսական հումանիտար բեռի՝ Արցախ մուտք գործելու մասին՝ այն էլ ռուս խաղաղպահների մասնակցությամբ, ապա այդ նույն ռուս խաղաղպահները երկու կողմով էլ՝ և՛ Լաչինի միջանցքով, և՛ Աղդամի ճանապարհով, կարող են ՌԴ-ից կամ Ադրբեջանից բացի այլ երկրից հումանիտար բեռներ տեղափոխել Արցախ։ Ես դրանում ոչ մի վատ բան չեմ տեսնում, Azg.am-ի թղթակցի հետ զրույցում ասաց Արցախյան շարժման ակտիվիստ, հասարակական-քաղաքական գործիչ Բորիս Առուշանյանը։
«Իսկ եթե խոսքը գնում է Աղդամ- Ստեփանակերտ ճանապարհի բացման և այդ ճանապարհով ադրբեջանական բեռներ տեղափոխելու, ադրբեջանցիների ելումուտի մասին, ես այդտեղ մեծ վտանգ եմ տեսնում։ Եթե նման խնդիր դրվի, պետք է եռակողմ համաձայնագրի բոլոր կետերի ապահովումից հետո միայն քննարկվի՝ այն էլ համաձայնագրի շրջանակներում պետք է բոլոր ճանապարհների մասին խոսք գնա։
Այսինքն՝ Հայաստանն Ադրբեջանին միացնող ճանապարհն Արցախի տարածքո՞վ լինի, թե շրջանցի Արցախը, նույն կերպ Քարվաճառը և այլն։ Այսինքն՝ եթե կոմպլեքս մոտեցում լինի, դա պետք է լինի համաձայնագրի կետերը կատարելուց հետո, քանի որ մինչ այսօր Հայաստանը գերակատարել է իր պարտավորությունները, իսկ Ադրբեջանը բոլոր կետերով խախտել է նոյեմբերի 9-ի համաձայնագիրը»,- ասաց մեր զրուցակիցը։
Բորիս Առուշանյանի խոսքով՝ եթե կողմերը ռուսների միջամտությամբ պայմանավորվել են երկու ուղղությամբ հումանիտար բեռներ բաց թողնել՝ այն էլ Ռուսաստանի և այլ երկրների, ապա դա կարելի է որպես կոմպրոմիսային տարբերակ քննարկել։
«Կարծում եմ՝ նման բան անում են՝ փրկելու Ալիևի դեմքը, որովհետև նա անցել է բոլոր սահմանները և այլևս չգիտի՝ ինչպես նահանջի։ Արցախցիներին սովի միջոցով այնպիսի վիճակում են դրել, որ ժողովուրդն այլ ելք չունի՝ կա՛մ պետք է թողնի-գնա Արցախից, կա՛մ զենքը ձեռքին կռվի։ Այլ ելք չկա. մեզ այնպիսի վիճակի մեջ են դրել, որ ուզած-չուզած՝ պետք է զենք վերցնենք։ Ուրիշ ի՞նչ պետք է անեն, հո սովից չե՞նք մեռնելու»,- հարց հնչեցրեց Բորիս Առուշանյանը։
Անդրադառնալով շրջանառվող տեղեկություններին, որ Լաչինի միջանցքով հումանիտար բեռնափոխադրումները կարող են վերականգնվել 12-24 ժամվա ընթացքում՝ մեր զրուցակիցը հիշեց ռուսական ասացվածքը։
«Ասացվածքն ասում է՝ «Մեկ անգամ խաբող մարդ, էլ ո՞վ քեզ կհավատա», այսինքն՝ ադրբեջանցիներն այնքան են խաբել, որ դժվար է հավատալ։ Բայց հույս ունենք, որ ռուսները կկարողնանա նրանց ստիպել՝ բացելու Լաչինի միջանցքը։ Անգամ Ռուսաստանում շատ գործիչներ հասկանում են, որ եթե Լաչինի միջանցքը չբացվի, պատերազմ է լինելու, և ՌԴ-ն, ուզած-չուզած, ներքաշվելու է դրա մեջ։
Եթե միջանցքը չբացվի, սա լինելու է առաջին և վերջին դեպքը, որ Աղդամ-Ստեփանակերտ ճանապարհով բեռներ մուտք կգործեն Արցախ։ Սրա հետևանքները ծանր են լինելու բոլորի համար»,- ամփոփեց մեր զրուցակիցը։
