Այս տարվա դեկտեմբերի 30-ի աշխատանքային երկուշաբթի օրը կտեղափոխվի 2013 թվականի դեկտեմբերի 28-ը` շաբաթ օր: Ինչպես հաղորդում է «Արմենպրես»-ըՙ այդ մասին հարցն ընդգրկված է ՀՀ կառավարության նոյեմբերի 21-ի նիստի օրակարգում:
Բացի դրանիցՙ 2014 թվականի հունվարի 27-ի, ապրիլի 21-ի, մայիսի 2-ի, հուլիսի 28-ի, օգոստոսի 18-ի եւ սեպտեմբերի 15-ի աշխատանքային օրերը, համապատասխանաբար, կտեղափոխվեն 2014 թվականի փետրվարի 1-ը, ապրիլի 26-ը, մայիսի 31-ը, օգոստոսի 2-ը, օգոստոսի 23-ը եւ սեպտեմբերի 20-ը` շաբաթ օրերը:
«Աշխատանքային օրերը տեղափոխելու մասին» ՀՀ կառավարության որոշման նախագծի ընդունումը պայմանավորված է քաղաքացիների` ՀՀ տոներին հանգիստը կազմակերպելու, ինչպես նաեւ ազգային տաղավար տոների եւ դրանց հաջորդող հիշատակի օրերին ննջեցյալների գերեզմանները այցելելու անհրաժեշտությամբ:
