Վ. Պ.
«Տարածաշրջանային եւ տեղական լեզուների մասին» Եվրոպայի խորհրդի հռչակագրի վավերացման համար խորհրդարանական քննարկումներ են ընթանում: Վրաց խորհրդարանի մարդու իրավունքների եւ քաղաքացիական ինտեգրման հանձնաժողովի նախագահ Էկա Բեսելիայի այս հայտարարությունը ներկայացրել է «Հարավային դարպաս» կայքէջը:
Ըստ այդմ, Էկա Բեսելիան նման հայտարարություն է արել ի պատասխան Վրաստանի հայ համայնքի «Միություն» տեղեկատվական կենտրոնի հարցերի:
Բեսելիայի խոսքերովՙ նախկին նախագահը բացասական քարոզչություն է իրականացրել այդ հարցի շուրջը, ինչի պատճառով հասարակության շրջանակներում առաջացել է վատ ազդեցություն:
«Մենք այս հարցի շուրջն անցկացնում են քննարկումներ եւ խորհրդակցություններ, ինչպես ներքին, այնպես էլ Եվրոպայի խորհրդի հետ, որի առաջ էլ ստանձնել ենք այդ պարտավորությունը», տեղեկացրել է վրացի պատգամավորը: Նրա խոսքերովՙ այս հարցի կապակցությամբ, առաջին հերթին անհրաժեշտ է բնակչության հետ անցկացնել որոշակի տեղեկատվա-լուսավորչական աշխատանք:
«Սաակաշվիլին, ցավոք, շատ բացասական քարոզչություն է սկսել: Հիշում եք, ոչ այնքան վաղուց էր, ԶԼՄ-ներում այնպիսի սյուժեներ էին տարածված, որտեղ նրա ներկայացուցիչները բացատրում էին եւ շատ բացասական մեկնաբանություններ անում, ասում, թե սա դավաճանություն է եւ ուղղված է պետության շահերի դեմ: Սա, իհարկե, շատ վատ ազդեցություն ունեցավ հասարակության վրա», պարզաբանել է մարդու իրավունքների եւ քաղաքացիական ինտեգրման հանձնաժողովի նախագահը:
Բեսելիան ընդգծել է, որ հասարակությունը պետք է տեղեկացված լինի, թե ինչ է դա, ինչ է նշանակում: «Դեռ աշխատանքներ պետք է կատարենք, որ մենք պատրաստ լինենք հաջորդ քննարկումներին»:
Թե որքանով այդ քննարկումները կազդեն ջավախահայության` լեզվին առնչվող խնդիրների վրա, պատասխանի համար դեռ պետք է սպասել, քանի որ որքան էլ այս հռչակագիրը կրկին մեջտեղ է բերվել, Վրաստանում շատերն են այն մեկնաբանում այնպես, թե հայերը կամ, ասենք, ադրբեջանցիները, ազգային փոքրամասնություն չեն Վրաստանում, ուստի լեզվի հարց բարձրացնել չեն կարող:
