Ամուսնալուծություն SMS-ներով
Տաջիկստանում բազմաթիվ կանայք խնդրանքով դիմել են հանրապետության Ներգաղթի ծառայությանը, որպեսզի վերջինս օգնի իրենց ամուսիններին, որդիներին ու եղբայրներին հայրենիք վերադարձնելու հարցում: Այդ մասին հաղորդում է «Ազատություն» ռադիոկայանի տեղական ծառայությունը:
Ռադիոկայանի տվյալներովՙ կանայք համանման խնդրանքով դիմել են նաեւ Ռուսաստանի Ներգաղթի դաշնային ծառայությանը (ՆԴԾ), որպեսզի իրենց հարազատներին արտաքսեն Տաջիկստան:
Դիմելու պատճառն այն է, որ Ռուսաստանում գտնվող աշխատանքային միգրանտներից շատերը կորցրել են կապը հայրենիքում մնացած ընտանիքներին, մասնավորապեսՙ կանանց հետ: Տաջիկուհիներից մեկը, օրինակ, պատմել է, որ իր ամուսինը վերջին տարիների ընթացքում ոչ մի անգամ կապ չի հաստատել իր հետ: «Իմացա, որ այնտեղ նա ամուսնացել է: Իր զավակներին փող չի ուղարկում: Թո՛ղ արտաքսեն նրան: Գուցե դա նրան դրդի վերադառնալ իր երեխաների մոտ», գանգատվել է տաջիկուհին:
Տաջիկստանի Ներգաղթի ծառայությունում հաստատել են, որ պատրաստ են օգնություն ցույց տալ կանանց, չնայած գերատեսչության հնարավորությունները սահմանափակ են:
Թե տաջիկուհիների խնդրանքներին ինչպես են արձագանքել Ռուսաստանի ՆԴԾ-ումՙ ռադիոկայանը չի հաղորդում:
Ավելի վաղ ստացված տեղեկությունների համաձայնՙ արտերկիր աշխատելու մեկնող Տաջիկստանի քաղաքացիների շրջանում վերջերս զգալի տարածում է գտել կարճ հաղորդագրություններիՙ SMS-ների միջոցով ամուսնալուծվելու սովորությունը: «Ֆերգանա» կայքէջի տվյալներով, աշխատանքային միգրանտները այդ մեթոդը յուրացրել են մի քանի տարի առաջ: Դրա էությունն այն է, որ ամուսինը կնոջը երեք անգամ կարճ հաղորդագրություն է ուղարկում «տալոկ» բառով (կամ զանգահարում է նրան եւ երեք անգամ արտաբերում է «տալոկ» բառը): Իսլամի կանոնների համաձայն, դա նշանակում է, որ ամուսինն ուզում է բաժանվել կնոջից:
Տաջիկստանի կառավարությանն առընթեր կրոնի գործերի կոմիտեում դատապարտել են տաջիկ տղամարդկանց նմանօրինակ գործողությունները:
Փող վաստակելու նպատակով Ռուսաստան մեկնած Տաջիկստանի քաղաքացիների թիվն անցնում է 1 միլիոնից: Նրանցից շատերն ամուսնացած են եւ դրամական առաքումներ կատարելովՙ նյութապես ապահովում են իրենց ընտանիքներին: Համաշխարհային բանկի գնահատումների համաձայնՙ 2012 թվականին տաջիկ աշխատանքային միգրանտները դրամական փոխանցումներով ապահովել են հայրենիքի ՆՀԱ գրեթե կեսը: Միեւնույն ժամանակ, տաջիկ աշխատավորների մի մասը նախընտրում է չվերադառնալ հայրենիք, ոմանք Ռուսաստանում նոր ընտանիք են կազմում:
