Երեկ առավոտից աշխատանքային այցով Շիրակի մարզում էր ՀՀ վարչապետ Տիգրան Սարգսյանը: Կառավարության ղեկավարն ու նրան ուղեկցող պաշտոնյաները նախ մասնակցել են Պեմզաշեն գյուղում մանկապարտեզի վերակառուցված շենքի բացման հանդիսավոր արարողությանը, որի առթիվ վարչապետը ողջունել եւ շնորհավորել է համայնքի բնակիչներին: Նա նաեւ շրջել է մանկապարտեզի սենյակներում, ծանոթացել մանուկների համար ստեղծված պայմաններին: 1960 թվականին կառուցված այդ շենքի վերանորոգման ծրագրի ընդհանուր արժեքն է 76.171.019 ՀՀ դրամ, նորոգման աշխատանքները սկսվել էին մեկ տարի առաջ:
Ժամանելով Գյումրի, Տիգրան Սարգսյանը շրջայց է կատարել նախկին մանկավարժական ինստիտուտի շենքում կառուցվող տեխնոպարկի տարածքում, հետեւել իրականացվող աշխատանքների ընթացքին: Նշվել է, որ կառույցը մինչեւ տարեվերջ կհանձնվի շահագործման: «Այսօր Գյումրու տեխնոպարկն ամբողջությամբ հագեցած է ծրագրերով,- լրագրողների հետ ճեպազրույցում ասել է վարչապետը: – Մի շարք միջազգային կառույցներ արդեն հայտ են ներկայացրել տեխնոպարկում գործունեություն իրականացնելու համար, այնպես որ տեխնոպարկի ծրագիրը 2014 թ. ամբողջությամբ կիրականացվի… ՏՏ ոլորտի տասնյակ ձեռնարկություններ այսօր սպասում են, թե երբ ենք տեխնոպարկի շենքը հանձնելու շահագործման»:
Գործադիրի ղեկավարն այցելել է Գ. Գյուլբենկյանի անվան վիրաբուժական հիվանդանոցի նախկին շենքը, նախկինում Գյումրու քաղաքապետարանին պատսպարած ստանդարտացման եւ չափաբանության տեղի կառույցի, ինչպես նաեւ «Սամարիթեր» հիվանդանոցի, ՀՀ ազգային վիճակագրական վարչության Գյումրու տարածքային բաժնի շենքերը, որոնց մի մասի վերաբերյալ խոսաակցություններ կան, թե դրանք հանձնվելու են իր ռազմաբազան քաղաքում ընդլայնող ռուսական կողմին: Այս մասին լրագրողների հարցին Տ. Սարգսյանը պատասխանել է, թե «Ձեզանից առաջին անգամն եմ լսում»: Նրա տեղեկացմամբ, նշված շինություններ դիտայցի նպատակն է ուսումնասիրել այդ տարածքներըՙ պետական գերատեսչությունները ռացիոնալ տեղաբաշխելու եւ պետական ծառայությունները քաղաքացիներին հասանելի դարձնելու համար:
Վարչապետը եղել է նաեւ ԳԱԱ Գյումրու Ա. Նազարովի անվան երկրաֆիզիկայի եւ ինժեներային սեյսմաբանության ինստիտուտի կիսակառույց շենքում, այցելել Գյումրիում բացված ռուսական գրքի տուն, ծանոթացել «Հոկտեմբեր» կինոթատրոնում կազմակերպված ավանդական ճաշատեսակների համտես-ցուցահանդեսին:
