Գերմանական HAYPRESS-ը ծանուցում է, որ ի պատասխան լրագրող Ջեննի Գյունթերի հարցին Գերմանիայի դաշնային կառավարության խոսնակ Շտեֆֆեն Հեբեշթրայթը (Steffen Hebestreit) կարծիք է հայտնել, թե ՄԱԿ-ի արդարադատության միջազգային դատարանի նախկին գլխավոր դատախազ Մորենո Օքամփոյի՝ ԼՂ-ում 120 000 հայերին Ադրբեջանի սովի մատնելը «ցեղասպանություն» դասակարգելը «քարոզչություն» է (պրոպագանդա): Խոսնակը գործածել է նաեւ Kampfbegriff բառը, որ հայերեն բացատրությամբ նշանակում է՝ մարտական (մարտավարական) հասկացություն: Ասել է, թե սա զգացական բառ է, որ նպատակ ունի հրահրել հակառակորդին, ստիպել ընդունել սեփական տեսակետը:
Գերմանահայ իրավաբանների միության նախագահ Գուրգեն Պետրոսյանը Գերմանիայի դաշնային կառավարության պահվածքը «ցինիկ» է որակում: Ուրիշ ի՞նչ հարմար բառ կարելի է գտնել այսպիսի բարոյազուրկ պատասխանը ճշգրիտ որակելու համար: Բեռլինում ՀՀ դեսպան Ենգիբարյանը RND-ին օգոստոսի 18-ի հարցազրույցում ակնարկել էր, որ Ադրբեջանը էթնիկ զտման համար սովն է որպես զենք օգտագործում, սակայն այս պարագայում Ադրբեջանի դեմ պահանջին ՀՀ ԱԳՆ պիտի գումարի իր դժգոհությունը նաեւ Գերմանիայի դաշնային կառավարությանը:
Ինչպես ուրբաթ օրվա՝ օգոստոսի 18-ի տպագիր «Ազգում» էինք ընդգծել, («Գերմանագիր մամուլում Արցախը սուբյեկտ է, իր մասին ի՛նքն է խոսում») գերմանագիր լրագրությունն իր գործը բարեխիղճ կատարում է՝ իրազեկում է արցախահայության ճակատագրի մասին, հաճախ հարցականով՝ «ցեղասպանությու՞ն է», հաճախ Մորենո Օքամփոյին հղում անելով՝ «սա արդեն ցեղասպանություն է»:
Թեման կշարունակենք առաջիկա ուրբաթ օրվա տպագիր «Ազգ»-ում:
Անահիտ Հովսեփյան
